අන්න එතකොට හැමදෙනාගෙම අවදානය ඔබ වෙතට යොමුවෙනවා. විශේෂයෙන්ම ස්ලෑන්ගාර්ඩ්ගේ. අන්න ඒක තමයි මගේ අවස්ථාව.
ඔබ මොකක්ද කරන්න හදන්නේ?
ඔබට ඒක බලාගන්න පුළුවන්වේවි. ඔබට පුළුවන්ද බල යෂ්ටිය පාවිච්චි කරන්න?
බෑ. ඒක කරන්න තරම් මම ශක්තිමත් නෑ.
කමක් නෑ. ඊළඟට ඔබට කරන්න තියෙන්නේ බල යෂ්ටියත් රැගෙන රැජින වෙත එන එක. මම හිතන්නේ ඔබට ඒකට ඔබේ හැකියාවන් යොදාගන්න වේවි. ඔබට පුළුවන්ද මේ ටික කරන්න.
පුළුවන් ලෝගන්. මගේ රැජිණිය වෙනුවෙන් මම මගේ ජීවිතය වුනත් දෙනවා.
ජීවිතය නම් අවශ්‍යවන්නේ නෑ එළීෂා. මේ ටික කළහම ඇති. එහෙම නම් මෙතන සැඟවී ඉන්න. මම යනවා එහා කෙළවරට.
ලෝගන්, වධක භූමියට ඉහළින් වු මාළිගාවේ පළමු මහළේ කොටස පෙන්වන්වමින් පවසා සිටියා.
හැමදේම හොදින් සිදුවේවි. මම යන්නම්.
ලෝගන් එළීෂාගෙන් වෙන්වීමට හදන විටම ලෝගන්ගේ දෙතොල් මත සිය දෙතොල් තැබූ එළීෂා ඔහුව ආදරයෙන් සිපගත්තා. ඒ කොළ පැහැති කාන්තිමත් ඇස්වලින් ඇය තුළ ඔහුට වූ ආදරය පිටාර ගලා යමින් තිබුණා.
පරිස්සම් වෙන්න ලෝගන්. මං ආදරෙයි ඔබට. ආපහු මා වෙතටම එන්න ලෝගන්.
එයට මඳ සිනහවක් නැගූ ලෝගන් කිසිදු ශබ්දයක් නොනගාම එම මහලේ විරුද්ධ කෙළවරට පිය නගන්නට පටන් ගත්තා. හෙමින් සීරුවේ එදෙසට ගිය ලෝගන්ට එහි රදවා සිටින ආරක්ෂක භටයින් දෙදෙනෙක් දක්නට ලැබුණා. කිසිදු ශබ්දයක් නොනගා තමන් ආසන්නයේම සිටින ආරක්ෂක භටයා වෙතට ළඟාවු වු ලෝගන් ඔහුගේ ගෙළ ඉදිරි පසින් සිට වමත දමා ආරක්ෂකයාගේ මුව වසා ගනිමින් අනිත් ආරක්ෂකයා වෙතට සිය කෙටි කබායේ ඇතුළු සාක්කුවකින් ඇදගත් කිණිස්සකින් දමා ගැසුවා. කිණිසි පහර වැදුණු ආරක්ෂකයා මොහොතකින් බිම ඇද වැටුණේ ශබ්ද නගමින් වුවත්, පහළින් වු ඝෝෂාවත් සමඟින් ඒ ශබ්දය කිසිවෙකුට නෑසී වියකී ගියා. ඊළඟ මොහොතේ දකුණතින් ගත් වක් පිහියෙන් ආරක්ෂකයාගේ ගෙළ සිදී ගියේ කිසිදු ශබ්දයක් නොනගායි. ඊළඟ මොහොතේ පහළින් වු ඝෝෂාව වියැකී ගියා.
තව අවධානය ඒ දෙසට යොමු කළ ලෝගන්ට දැකිය හැකි වුයේ, මොහොතකට පෙර එළීෂා පෙන්වු දොරටුව විවරවන බවයි. විවර වු දොරටුව තුළින් ඔහුට දැකගත හැකිවුයේ එළිය භට කණ්ඩායමක් පෙරටු කොටගෙන එන ස්ලෑන්ගාර්ඩ්. ඔහු පිටුපසින් රැජිනත්, ඔවුන් විසින් අල්ලාගෙන දෑත් පිටුපසට කොට ගැටගසා දමා සිටි නිකොලස් හා නයෝමිද දක්නට ලැබුණා. ඔවුන් පිටුපසින් වධකයාත්, එළීෂාගේ සොයුරිය වූ නීසාත් පැමිණියා. ඇගේ මුහුණේ දකින්නට ලැබුණේ ජයග්‍රාහී සිනහවක්.
ස්ලෑන්ගාර්ඩ් යනු අඩි හයක් පමණ උස්වූ එයටම සරිලන මහතකින් යුක්ත වු පුද්ගලයෙකි. ඉතාමත් රෞද්‍ර මුහුණකින් යුක්ත වු ඔහු රත්තරන් පැහැයෙන් යුතු වු කලිසමක් හා කබායක් පැළද සිටියා. එය ඔහුගේ සමේ අඳුරු පැහැයට මනාව ගැලපෙන්නක් වුනා. දිගු අසිපතක් ඉණේ වම් පස රදවාගෙන සිටි ඔහුගේ ඉණේ දකුණු පස කිරිච්චියක් රදවා තිබුණා. රත්තරන් පැහැයෙන්ම නිමවූ පාවහන් දෙකකින් ඔහුගේ දෙපා ආවරණ වුනා.
නීසාගේ දසුනින් එළීෂා මහත් වු කෝපයට පත්වුයේ එවැනි අත්දැකීමක් ඇය මින් පෙර කිසිම දිනෙක් විද නොතිබුණු නිසයි. තමන්ගේම සොයුරිය, තමන්ව හා තම මිතුරන්ව ස්ලෑන්ගාර්ඩ් හට පාවා දේවි යැයි ඇය කිසිවිටෙකත් සිතුවේ නෑ.
හිස ගසා දැමීමට සුදානම් කර තිබු වේදීකාවට නැගගත් ස්ලෑන්ගාර්ඩ් ඇතුළු පිරිස රැජනගේ හිස ගසා දැමීමට සූදානම් වුනා. ස්ලෑන්ගාර්ඩ්ගේ කටුක ගොරහැඩි හඩ භූමිය පුරා විහිදී ගියා.
සෙලීනාගේ කටුක කෲර පාලනය මම, ඔබේ නව රජු වන මම අදින් අවසන් කරනවා. ඔබලාව මෙතෙක් කල් බලහත්කාරයෙන් පාලනය කළා වු මේ දුෂ්ඨ රැජිනිය අද
සදහටම නිහඩවෙනවා.
තවත් මොහොතකින් මෙම අදහස්වලට විරුද්ධව රැස්ව සිටි පිරිස අතරින් යම්
හඩක් නැගී එන්නට පටන්ගත්තත් ඊළඟ මොහොතේ ඇසුණු කටුක වදනින් ඒ හඩවල් නැවත වරක් යටපත් වී ගියා.
තොපගේ ඔය නොහික්මුණු කටවල් වසා දමනු. කවර හේතුවකටවත් මාගේ කතා කිරීමට මගේ පාලනය යටතේ තොපට කිසිම ඉඩක් නෑ. එහෙම අකමැති කෙනෙක් ඉන්නවා නම් අන්න අතනින් ඔහුගේ විරුද්ධත්වය ඉවර වෙනවා.
ස්ලෑන්ගාර්ඩ් වේදිකාව මත තබා තිබු දම් ගෙඩිය වෙතට තම දකුණු අත දික්කරමින් පැවසුවා.
මේ ඉන්න පිටින් ආ ද්‍රෝහියෝ දෙන්නා උත්සාහ කළා රැජිනව බේරගන්න.
වේදිකාව මත අත් පසුපසට තබා බැද දණ ගස්වා තිබු නයෝමි හා නිකොලස්ව දක්වමින් ස්ලෑන්ගාර්ඩ් පැවසුවා.
ඒත් මගේ හිතේෂිවන්තිය මට ඒක කළින්ම දැනුම් දුන්නා.
ඔහු නීසාව දක්වමින් කියා තිබුණා.
ඒ නිසා ඒ කූට කුමණ්ත්‍රණය පරද්දලා මේ ද්‍රෝහීන් දෙන්නව පණ පිටින් අල්ලගන්න මට අවස්ථාව ලැබුණා. මුං දෙන්නා එක්ක ආපු අනිත් එවුන් මෙච්චර වාසනාවන්ත වුනේ නැ. උන් දැනටමත් පරලොව ගිහිල්ලා ඉවරයි මගේ සයිරන්වරුන් අතින්. රැජිනව බේරගන්න උත්සාහ කරපු මේ පණ පිටින් ඉන්න ද්‍රෝහීන්ටත් තව මොහොතකින් අත්වෙන්නේ රැජිනගේම ඉරණමයි.
මොහොතක් නිශ්ශබ්දව සිටි ඔහු සිය හිසෙන් ගහලයාට යම් ඉඟියක් කළා. මෙතෙක් වේලා එය බලාපොරොත්තුවෙන් සිටි ගහලයා ඉදිරියට පියවරක් තබා රැජිනගේ දකුණු උරහිසෙන් අල්ලා තමන් වෙතට ඇදගත්තා. දින ගාණක් සිරගතව වද වේදනා විදිමින් හරි හමන් ආහාරයක් නැතුව අප්‍රාණිකව සිටි ඇය පරඩැලක් මෙන් ගහලයා වෙතට ඇදී ආවා. අනතුරව ඇයගේ ගෙලෙන් අල්ලා ගත් ඔහු ඇයගේ ගෙල දම් ගෙඩිය මත තබා එයට තද වෙනසේ ගැට ගසා දැමුවා. අනතුරුව දම් ගෙඩියේ දකුණ පසට වු ඔහු හිස් ගසා දැමීමට විශාල ප්‍රමාණයේ වධක කඩුව තම හිසට ඉහලින් ඔසවා ස්ලෑන්ගාර්ඩ්ගේ අණ බලාපොරොත්තුවෙන් ඒ දෙස බැලුවා.
අවසාන වචනයක් කියන්න තියෙනවාද රැජිණියනි?
සමච්චල් සහගත සිනහවක් සිය මුවට නගාගත් ස්ලෑන්ගාර්ඩ් සඳ රැජිනියගෙන් විමසා සිටියා.
අඳුරු මායාවන්ට යටවෙලා උඹ මේ කියන්නේ බොරු බව මගේ වැසියෝ දන්නවා. ඒ වගේම ඔවුන් දන්නවා මම තවදුරටත් ඒ අතීතයේ හිටපු දුෂ්ඨ රාජිනිය නොවන බව. ඒ ඇති මට සැනසිල්ලේ මැරෙන්න.
සැනසිල්ල කෙසේ වෙතත් නුඹට මරණය අත්වෙන බව නම් නිසැකයි.
මොහොතකින් ස්ලෑන්ගාර්ඩ් තම සුරත ඉහළට එසවුයේ ගහලයාට අවශ්‍ය සංඥාව ලබා දීමටයි. ඒ අත පහත වැටීමට මොහොතකට පෙර ඔවුන්ට එක එල්ලේම ඉදිරි පිටින් වු මාළිගයේ පළමු මහළින් මතු වු ආලෝකයක් බිම් මහළ සිසාරා ගමන් කළා. ඒ එක්කම එකම එක වදනක් බිම් මහලේ සිටි පිරිසගේ කණ වැකුණා.
“නවතිනු”
ආලෝකය මැදින් අපහසුවෙන් ඒ දෙස බැලූ පිරිසට දැකගත හැකිවුයේ එහි කෙටි බිත්තිය මතට නැග රැජිනගේ බල යෂ්ටිය සිය හිසට ඉහළින් අල්ලාගෙන සිටින එළීෂායි. බල යෂ්ටියෙන් නිකුත් වු ආලෝකය ඉහළ මහලේ අඳුර බිදගෙන අවට පරිසරය සිසාරා පැතිර ගියා.
ඒ සමඟින්ම ස්ලෑන්ගාර්ඩ්ගේ හා නීසාගේ මුහුණු වල බලාපොරොත්තු කඩවීමක සේයාවන් ඇදී ගියා.
“එය විය නොහැකියි”
ස්ලෑන්ගාර්ඩ් එය පවසා නිමවනවාත් සමඟ වේදිකාව සෙළවී ගියේ වෙඩි ශබ්දයකුත් සමඟයි. ක්ෂණයකින් ආපසු හැරී වේදිකාව දෙස බලන විට එය මැද සිටිගෙන සිටින ලෝගන්ගේ රුව ඔහුට දක්නට ලැබුණා. කිසිවක් සිතන්නටත් පෙර තමන්ට එල්ල වු දැවැන්ත පා පහරේ වේගයෙන් වේදිකාවෙන් ඉවතට විසිවී ගිය ස්ලෑන්ගාර්ඩ් පහළ වු වැලි පොළොව සිපගත්තා. ලෝගන්ගේ වෙඩි පහරට ගොදුරු වු ගහලයා ඒ වන විටත් අවසන් ගමන් ගොස් සිටියා. ඊළඟ නිමේෂයේදී තම ඉණෙන් පිටු පසින් ගත් පිහියෙන් නිකොලස්ගේ බැදුම් කපා හල ලෝගන් පිහිය හා එක් පිස්තෝලයක් ඔහු අතට දුන්නේ අනිත් අය නිදහස් කරන්න යැයි පවසමින්.
ඊළඟ මොහොතේ “ඉන්ෆීරියුම්” අසිපත අතට ගත් ඔහුගෙන් පහර කා අවසන් ගමන් ගියේ වේදිකාව මත ආරක්ෂාවට සිටි සයිරන්වරුන් දෙදෙනයි. ඒ සමඟින් මාළිගයේ මාළයේ සිටි එළීෂාගේ කටහඩ බිම් මහල පුරාම රැවු පිළි රැව් දී ගියා.
“සටන් කරන්න, අපගේ රැජින වෙනුවෙන් සටන් කරන්න. සෙබළුනි, ඔබලාගේ රැජින වෙනුවෙන් සටන් කරන්න. අපව පාගා දමන නායකයෙක් අපිට එපා”
මේ වදන් පෙළත් සමඟ බිම් මහලෙහි වු වැසියන් අතර මහත් වු උද්යෝගයක් පැතිර ගියා. බොහොමක් සෙබළු තම හිස වසා තිබු හිස් ආවරණය ඉවත්කොට සාමාන්‍ය ජනතාව සමඟ එකතු වුයේ ස්ලෑන්ගාර්ඩ්ට පක්ෂපාත සෙබළුන්ට එරෙහිවයි. නිකොලස්, පළමුවෙන්ම නයෝමිගේ බැමි කපා ඇයව නිදහස් කර දැමුවා. සිය උරහිස හරහා දමාගෙන තිබු කටානා අසිපත එයින් මුදවා ගත් ලෝගන් එය හා ඉතිරි පිස්තෝලයත්, “කාර්ටිරිජ්” දමා තිබූ කුඩා බෑගයත්ද සමඟින් නයෝමි අත තබා වේදිකාවෙන් බිමට පැන්නේ ස්ලෑන්ගාර්ඩ්ට මුහුණ දීමට. ඒ වන විටත් නැගී සිටි ස්ලෑන්ගාර්ඩ් තම සෙබළුන් මෙහෙයවන්නට පටන්ගෙන තිබුණා.
මේ වන විට එළීෂා ඉහළ මාළයේ සිට පහළට දිව එමින් සිටියේ තම අත රැදි බල යෂ්ටිය රැජිනට ලබාදීමේ අරමුණින්. රැජිනව දම් ගෙඩියට බැද දමා තිබී වරපට කපා දැමූ නිකොලස්, ඇයගේ දෑත් බැදි ලණු පොටද කපා දමා ඇයව තම සිරුරට වාරු කරගත්තේ ඇය නැගී සිටිමටවත් නොහැකි තරමට දුර්වලව සිටි නිසයි. පිස්තෝලෙන් හා කටාන අසිපතෙන් සන්නද්ධව සිටි නයෝමි නිකොලස්ට ඉදිරියෙන් සිටගත්තේ රැජිනගේ ආරක්ෂාව තහවුරු කිරීමටයි. ඒ වන විටත් වේදිකාවට පිවීසීමට තැත් කළ ස්ලෑන්ගාර්ඩ් හට පක්ෂ පාතී වු ආරක්ෂකයන් කීප දෙනෙකුටම ඇය වෙඩි තබා බිම හෙළා තිබුණා.
උඹද රැජිනගේ ගැලුවුම්කාරයා? අද තමයි උඹ ස්ලෑන්ගාර්ඩ්ගේ අසිපතේ රහ බලන්නේ, යැයි පවසමින් සිය අසිපතෙන් ලෝගන් වෙත මරු පහරක් එල්ල කළා. කිසිදු උපද්‍රවයකින් තොරව පහසුවෙන් එම පහර හිස නමා වලක්වාගත් ලෝගන් තම අසිපතින් පහරක් එල්ල කරමින් ඔහු හා සටනට වැදුණා. කිහිපවිටක්ම එකිනෙකා හා පොර වැටී සටන් කළ ඔවුන් දෙදෙනාම තේරුම් ගත්තේ තමන් සටන් වදින්නේ එසේ මෙසේ ප්‍රතිමල්ලවයන් සමඟ නොවන බවයි.
ඉහළ මහලෙන් පහළට බට එළීෂා, එහි පොදි කමින් සිටි පිරිස අතරින් දිව ආවේ තම රැජිනිය වෙතටයි. ස්ලෑන්ගාර්ඩ් හට පක්ෂපාත භටයෙක් ඇයට පහර දීමට තැත් කළත් රැජිනට පක්ෂපාත සෙබළුන් දෙදෙනෙක් එය වළක්වා එළීෂාට ආරක්ෂිතව රැජින රැදී සිටි වේදිකාවට යෑමට මඟ තනා දුන්නා.
වේදිකාවට නැගීමට තනා තිබූ පිය ගැට පෙළ ආරම්භයේදිම නීසා පිහියක් රැගෙන ඇගේ ඇඟට කඩා පැන්නා. බල යෂ්ටිය පසෙකට විසිවී ගියා. බිම වැටී සිටි එළීෂගේ සිරුරු මතට නැග ගත් ඇයගේ බෙල්ලෙන්ම අල්ලා ගත් නීසා, තම අතවු පිහිය එළීෂාගේ පපුවට කිදා බැස්ස වීමට මහත් වෙහෙසක් ගත්තා.
උඹ නිසා මට හැමදෙයක්ම නැති වුනා. මම උඹට ජීවත්වෙන්න ඉඩ තියන්නේ නෑ.
මම රැජිනගේ සේවිකාවක්. මම ඇයට සේවය කිරීමට කැපවී සිටිනවා. ඔබත් එහෙමයි.
නීසාගේ අත තදින් අල්ලාගත් එළීෂා අපහසුවෙන් පවසා සිටියා.
රැජිනට සේවය කරලා මට ලැබුණු දෙයක් නෑ. ලැබෙන්න තිබ්බ දේවලුත් නුඹ නැති කරලා දැම්මා.
ඊළඟ මොහොතේ මහත් වැර යොදා නීසාව පසෙකට තල්ලු කරදමමින් එළීෂා නැගී සිටියත් නීසා ඊළඟ මොහොතේ එල්ල කළ පිහි පහර මඟ හරවන්නට ඇයට හැකියාවක් ලැබුණේ නෑ. එය ඇගේ උදරයේ දකුණු ඇළපත කපාගෙන ඇතුළට බැස්සා. එළීෂාට තවත් පහරක් එල්ල කරන්නට නීසා ඉදිරියට පැන්නත් එළීෂාගේ උදව්වට පිය ගැට පෙළේ පහළට පැමිණ සිටි නයෝමි එල්ල කළ පා පහරින් පසෙකට විසිවී ගියා. ක්ෂණයකින් තමා අතවු ලෝගන්ගේ පිස්තෝලය නීසාගේ පපු පෙදෙසට එල්ල කර නයෝමි එහි කොකා ගැස්සුවා.
දකුණ අතින් තම ඇළපත අල්ලාගෙන සිටි එළිෂාගේ අතැඟිලි අතරින් රක්ත වර්ණ වු රුධිරය ගලා ගියා. ඊළඟ මොහොතේ නයෝමි ඇය වෙතට දිව ආවා.
නයෝමි, ඉක්මන් කරන්න, බල යෂ්ටිය රැජින වෙත ගෙන යන්න. ඇය බොහොම දුර්වලයි. එය නැතිව ඇය තව වැඩිවෙලාවක් ජීවත්වෙන එකක් නෑ.
පසෙක වැටී තිබුණු බල යෂ්ටිය තම අතට අරගත් නයෝමි වේගයෙන් පිය ගැට පෙළ ඔස්සේ වේදිකාව මතට දිව ගියා. රැජින ඉදිරියේ දණ ගසා ගත් ඇය තමන් අත තිබූ බල යෂ්ටිය දෑතින්ම තම හිසට ඉහළින් ඔසවා සිටියා. නිකොලස්ට වාරුවී ඉමහත් අපහසුවෙන් සිටි ඇයට එය තම අතට ගැනීමට දැඩි වෑයමක් යොදන්නට සිදුවුනා. බල යෂ්ටිය ඇයගේ අතට පත් මොහොතේම එහි ඉහළ කෙළවරට යොදා තිබූ කහ පැහැති මාණික්‍ය දිදුලන්නට පටන්ගත්තේ එහි එළියෙන් සැමගේ ඇස් නිලංකාර කරවමින්. මොහොතකින් එම එළියෙන් රැජින පමණක් නොව වේදිකාවම වැසී ගියා.
තවත් මොහොතකින් එම එළිය පහවී ගියෙන් සැමගේ ඇස් යොමුවුනේ වේදිකාව දෙසටයි. වේදිකාවේ කෙළවර තම බල යෂ්ටිය දකුණතින් දරමින් ප්‍රතාපවත් ලෙස සෙලීනා රැජින, ජීවයේ හා මරණයේ දේවතාවිය රැදී සිටියා. ඇගේ මුහුණු හා ශරීරයේ වු තුවාල කැළල් හා ලේ ගලමින් පැවති තුවාල තවදුරටත් දැකිය හැකිවුවේ නෑ. ඇය නැවතත් තම සුපුරුදු ස්වරූපය හා බලය ලබාගෙන සිටියා. ඇයට වම් පසින් නිකොලස් හා දකුණු පසින් නයෝමිත් රැදී සිටියා. මේ දර්ශනය සියළුදෙනාම මොහොතකින් දණින් වැටුණේ සිය රැජිනට ඇති පක්ෂපාතීබාවය ප්‍රදර්ශනය කිරීමටයි. ඒ අතර මෙතෙක් වේලා ඇයට විරුද්ධව ස්ලෑන්ගාර්ඩ් හට සහය පළ කළ ආරක්ෂකයින්ද වුනා.
මේ සියල්ලම සිදුවන අතර තුරත් ලෝගන් හා ස්ලෑන්ගාර්ඩ් පොර වැටී සටන් වදිමින් සිටියා. එකිනෙකාට එල්ල කරනා අසිපත් පහරවල් තම අසිපත් වලින් වළකමින් දිගින් දිගටම ඔවුන් දෙනාට සටනේ යෙදුණා. ස්ලෑන්ගාර්ඩ් කීප වරක්ම ලෝගන්ට විරුද්ධව තම අඳුරු මායාවන් යොදාගත්තත් ඒවා පළනොමැතිව ගියේ ඔහු අත දැරූ “ඉම්ෆීරියුම්” අසිපත නිසයි. පිටතට නොපෙන්නුවත් මෙය ස්ලෑන්ගාර්ඩ්ගේ සිත භීතියට පත්කළ කාරණයක් වුනා. ඊළඟ මොහොතේ ස්ලෑන්ගාර්ඩ් එල්ල කළ අසිපත් පහර තම අසිපත හිසට ඉහළින් ඔසවා නවත්වාගත් ලෝගන් තම අසිපතින් ස්ලෑන්ගාර්ඩ්ගේ අසිපත ඉවතට තල්ලු කරදමමින් ඔහුගේ පපුව ප්‍රදේශයට වැරෙන් පා පහරක් එල්ල කළා. එයින් තම සමබරතාවය බිදී ගිය ස්ලෑන්ගාර්ඩ් පසු පසට විසිවෙනවාත් සමඟම වේගයෙන් ඉදිරියට පිනූ ලෝගන් තම අසිපතින් ස්ලෑන්ගාර්ඩ්ගේ උදරය කැපී යන පරිදි මරු පහරක් එල්ල කළා. එම පහරත් කාගෙන නැවත වරක් සටනට ආ ස්ලෑන්ගාර්ඩ්ගේ අසිපත් පහර වලක්වා ගත් ලෝගන් තම අසිපතේ මිටෙන් ස්ලෑන්ගාර්ඩ්ගේ හිස පැළී යන පරිදි දැඩි පහරක් එල්ල කළා. ඒ පහර වැදුණු ස්ලෑන්ගාර්ඩ් පසෙකට වැටෙනවාත් සමඟම වහා ක්‍රියාකාරී වු ලෝගන් සිය අසිපතින් ඔහුගේ වම් කකුලේ බල නහරයට ඉහලින් වු කණ්ඩරාව සිද දැම්මේ ඔහුට නැවතත් නැගීටීමට ඉඩක් නොතබමින්.
දණින් වැටුණු ස්ලෑන්ගාර්ඩ් නැවත නැගිට ගැනීමට මහත් වීරියක් ගත්තද ඔහුට එය කිරීමට හැකියාවක් තිබුණේ නෑ. ඊළඟ මොහොතේ ලෝගන් ස්ලෑන්ගාර්ඩ්ගේ දකුණු පසින් ස්ථානගත වුයේ සිය අවසන් පහරට සුදානම් වෙමින්.
ඔය සාමාන්‍ය අසිපතකින් මාව විනාශ කරන්නට බෑ මෝඩයෝ. මම එනවා ආපහු, අර දුෂ්ඨ රැජිනව විනාශ කරලා දාන්න.
තවත් කට මෑත දොඩවනවා. තාමත් උඩඟුකම. තමන්ගේ අඳුරු මායාවන් මට බලපෑවේ නැති වුනහමත් තමන්ට හිතුණේ නැද්ද මේක සාමාන්‍ය අසිපතක් නෙවෙයි කියලා? මම හිතන්නේ නෑ. එතරම්ම මානයෙන් උඩඟුවෙලානේ හිටියේ. මේක සාමාන්‍ය අසිපත් නෙවෙයි කියලා විතරක් මතක තියාගන්නවා. මේ පාර ආපහු එන්න වෙන්නේ නෑ. දැන් ආපු අපායකටම ආපහු පළයන්.
මෙසේ පැවසූ ලෝගන් “ඉන්ෆීරියුම්” අසිපතේ මිට තම සිරුරේ දකුණු පසින් හිස ආසන්නටම ඔසවා එය වේගයෙන් ස්ලෑන්ගාර්ඩ්ගේ ගෙළ වෙත පාත් කළා. හිස සිදුණු කවන්ධය පොළොව සිප ගන්නා අතරම එහි හිස පසෙකට පෙරළී ගියා.
අසිපතේ තැවරුණු රුධිරය ස්ලෑන්ගාර්ගේ වස්ත්‍රයෙන්ම පිසදාගත් ඔහු තම අසිපත කොපුවේ බහාගෙන ලෝගන් වේදිකාව දෙසට හැරුණේ නයෝමි ඔහුව අමතන හඩින්. වහා එදෙසට දිව ගිය ලෝගන්ට දැකිය හැකිවුයේ බිම දණ ඇණගෙන සිටි නයෝමිගේ සිරුරට හේත්තු වී සිටින එළීෂායි. මොහොතකින් එහි දණ ගසාගත් ලෝගන් එළීෂාව තම තුරුල්ලට ගත්තා. ඇගේ ඇළපතින් තව දුරටත් රුධිරය ගලා යමින් තිබුණා. ඔහු රැජිනිගේ මුහුණ දෙස බැලුවේ ඇයට යමක් කළ හැකිදැයි විමසන්නාක් මෙනි.
මම උත්සාහ කළා ලෝගන්. ඒත් මම පරක්කු වැඩියි.
ලෝගන්ගේ සිතේ ඇදි අදහස තේරුම්ගත්තාක් මෙන් රැජින පවසා සිටියා.
ලෝගන්, ඔබ අවසානයේ මා වෙත පැමිණියා.
එළීෂා අපහසුවෙන් පැවසුවා. ඇගේ දෑස්වලින් කඳුළු කැට ගලා ආවේ අවට සිටිය අයගේද දෑස් තෙත් කරමින්. ලෝගන් ඇගේ අත තදින් අල්ලා ගත්තා.
මගේ රැජින වෙනුවෙන් කරන්න පුළුවන් හැමදෙයක්ම මම කළා. ඒ ගැන මම සතුටු වෙනවා. මට යන්න කාලය හරි ලෝගන්. ඔබේ උණුසුමේ මිදිමට සිදුවීම තමයි මට ඇති එකම කණගාටුව. ඒත් එක අතකින් මම වාසනාවන්තයි. මට ඔබේ උණුසුමේම මියයන්නට පුළුවන් වුනා. ඒ නිසා මම සතුටින්.
එසේ පැවසූ එළීෂා නිහඩ වුනා. ලෝගන්ගේ අත තදින් අල්ලා ගත් එළීෂා ලෝගන්ගේ දෑස් දෙස බලමින්ම ඔහුගේ දෑත් මතම තම අවසන් හුස්ම පොද වා තලයට මුදා හැරියා. පහත් වී ඇගේ මුව සිපගත් ලෝගන් ඇයට තම තුරුල්ලට තද කරගත්තා. ඔහුගේ ඇස්වල ගලා ආ කඳුළු කැට වලින් එළීෂාගේ පියකරු මුහුණ තෙමී ගියා.
___________________________________________________________________________________
KB 2021.04.29
අඳුර බිද හෙළමින් හිරුගේ ලා රැස් කිරණ දඩයක්කරුවා ඇතුළු පිරිසගේ නවාතැන් පොළට පිවිසෙන්නට ගත්තේ ඔවුන්ගේ අවසරයක් නොපතාමයි. තමාට තදින් තුරුළු වී සුවසේ නිදන යුවතියගේ නින්දට බාධාවක් නොකර අපහසුවෙන් නැගී සිටි ලෝගන් තමන් පළදින දිගු කබාය ඇයගේ ශරීරය ආවරණව වන සේ පොරවා “ඉම්ෆීරියුම්” අසිපත අතට ගත්තා. එයත් රැගෙන ගල් තලාවෙන් මඳක් ඔබ්බට ගිය ලෝගන් අසිපතත් සමඟ තමන් සැමදා කරන පුහුණුවීම් කටයුතු වල යෙදුණා. තමන් සිතින් මවා ගන්නා සතුරන් සමඟ ඔහු කිහිප විටක්ම සටන් වැදුණේ තමන්ට ලැබුණු මේ බලගත් අසිපත තව දුරටත් තම දෑතට හුරු කරගන්නටයි. අද තමන්ට කරන්නට ඇති කටයුත්ත තුළදී කිසිදු අත පසුවීමකට ඉඩක් නොතැබිය යුතු යැයි ඔහුගේ සිත පුන පුනා ඔහුට කියා සිටියා. තමන්ගේ පුහුණු කටයුතු අවසන් කර දහඩිය පිරුණ ගතින් ගල් තලාව වෙත එන ඔහු දුටුවේ අනිත් අය ඒ වන විටත් අවදිව ඇති බවයි.
ලෝගන්, ඔබ පුහුණු වන ආකාරය නම් බලන්න ලස්සනයි.
ස්තුතියි නයෝමි. මම හිතනවා අද අපිට පුහුණුවීම් වලින් ඔබ්බට යන්න සිද්ධ වේවි කියලා.
අසිපත හොදින් පිරිසිදු කර නැවත වරක් එය කොපුවේ බහා එය රෙදි කඩින් ආවරණය කළ දඩයක්කරුවා එළීෂා දෙසට හැරුණේ තමන්ගේ ඊළඟ පියවර කුමක්දැයි කියා විමසීමටයි. ඇගේ ඇස් ආදරයෙන් වගේම ලැජ්ජාවෙනුත් පිරී තිබුණා.
එළීෂා, අපි කොහාටද යන්න ඕන?
අපි තව දුරටත් දකුණට යන්න ඕන. එය පැය කිහිපයක දුෂ්කර ගමනක් වනය මැදින්. කොහොමත් අපිට හවස හතර පමණ වන විට “ආත්මයන් නිදන විල” අසලට පැමිණිය හැකි වේවි. එතැන අපිට සැඟවී සිටින්නට වෙනවා අඳුර වැටෙනකම්. විල හරහා යෑමට අවශ්‍ය කටයුතුත් මම ලෑස්ති කරලා තියෙන්නේ.
මාළිගයේ ආරක්ෂයින් දකින්නේ නැද්ද අපි විල තරණය කරණකොට.
දකින්න නම් ඉඩ තියෙනවා නයෝමි. ඒත් එහෙම දකින්නේ අපේ කාර්යයට සම්බන්ධ එයට සහයෝගය දෙන ආරක්ෂකයින්. ඔවුන් තමන්ගේ රාජකාරී කටයුතු කරන පැත්තෙන් තමයි අපි දූපතට ඇතුල්වන්නේ. සටනක් ඇති වුනොත් ඔවුන් අපිට එකතු වේවි.
එහෙම හොදයි. අපි උදේ ආහාරය අවසන් කළ විගසම පිටත්වෙමු.
ඒක හරි. රැජිනව බේරා ගැනීමේ කටයුත්තට අපේ සම්පුර්ණ ශක්තියම යොදවන්න අවශ්‍ය වෙනවා. ඒ නිසා පැය කිහිපයක විවේකයක් අපිට වටිනවා. අපි ඉක්මනින්ම පිටත්වෙමු.
ඒක ඇත්ත ලෝගන්.
වැඩි වේලාවක් ගත නොකරම සිය උදෑසන ආහාරය අවසන් කළ දඩයක්කරුවා ඇතුළු පිරිස අසුන් පිටට නැගුණා. එළීෂා සුපුරුදු ලෙසින් අසුන් රහිතව තම ගමන යෑමට තැත් කළත් ලෝගන් ඇයව සිය අසු මතට නග්ගවා ගත්තා. වනය හරහා පැය කිහිපයක දුෂ්කර ගමනකින් අනතුරුව ඔවුන් විශාලව වැඩී තිබුණු වනස්පතියක් අසලට පැමිණියා.
මෙතන ඉදන් තව ටික දුරයි තියෙන්නේ “ආත්මයන් නිදන විල” වෙත. අපි අසුන්ව මෙතන බැදලා දාලා යමු. ඒක වඩාත් ආරක්ෂිතයි.
මේ කැලේ අස්සයෝ දාලා යන්න පුළුවන්ද එළීෂා?
ඒ ගැන කරදරවෙන්න එපා නයෝමි. මේ අසුන් මෙතනින් ඉවත් කර ආරක්ෂිත තැනකට ගෙන යෑමට මම කටයුතු යොදලා තියෙන්නේ.
ඔබ හැමදෙයක්ම හොදින් හිතලා බලලා කටයුතු කරලා එළීෂා.
මගේ රැජිනගේ නිදහස, ආරක්ෂාව වෙනුවෙන් මම හැමදෙයක්ම කරනවා නිකොලස්. අපි ඉස්සරහට යමු. විලට ආසන්නයේ අපිට සැඟවී සිටිය හැකි තැනක් තියෙනවා. අපි අඳුර වැටෙනකම් එතැන් ඉමු. එහෙම නම් අපි පිටත් වෙමු.
අසුන් ආරක්ෂිතව ගස් වල බැද දැමු ඔවුන් ඉතාමත් නිශ්ශබ්දව වනය හරහා තමන්ගේ ඉලක්කය කරා ගමන් කළා. පැයකට පමණ පසු ඔවුන් සිවුදෙනා සවස 4.30 පමණ වන විට කිසිදු උපද්‍රවයකින් හෝ කිසිවෙකුගේ ඇස ගැටීමකින් තොරව ඔවුන්ගේ ආරක්ෂිත ස්ථානයට පැමිණියා.
මෙතන ආරක්ෂිතයි. මේ ගස් හින්දා අපිව පෙන්නේ නෑ. ඒ විතරක් නෙවෙයි මගේ මායා වලිනුත් මෙතන ආරක්ෂා කරලා තියෙන්නේ. අපිට අඳුර වැටෙනකම් මෙතන විවේක ගන්න පුළුවන්. මෙතන ඉදන් විලට තියෙන්නේ විනාඩි පහළොවක පමණ දුරක්. අපිට තියෙන්නේ මම සඟවලා තියෙන බෝට්ටුව අරන් විල තරණය කරලා දුපතට ගොඩවෙන්න.
වැඩි කතා බහකින් තොරවම පිරිස කාලය ගෙවා දැම්මේ තමන්ට පැවරී ඇති රාජකාරියේ බැරෑරුම් බව සියල්ලන්ගේම සිත්වලට දැනුණු නිසයි. පැය එක හමාරක් පමණ විවේක ගත් දඩයක්කරුවා ඉන් අනතුරුව තමන්ගේ පිස්තෝල දෙක හා මස්කට් වර්ගයට අයත් තමාගේ තුවක්කුව පිරිසුදු කොට එයට තෙල් දමා එහි ක්‍රියාකාරීත්වය පරීක්ෂා කර බැලුවා. කිසිදා පිස්තෝලයක් නොදැක තිබූ එළීෂාට ලෝගන්ගේ මෙම ක්‍රියාවලිය ගැන මහත්වු කුතුහලක් ඇති වුනා.
ලෝගන්, මේ මොනවද?
ඔහුගේ ආයුධ වලට අත දිගුකරමින් ඇය විමසා සිටියා.
මේවා මගේ ආයුධ. අපි ඒවට ගිනි අවි කියලා කියනවා. මේ කුඩා ඒවට කියන්නේ පිස්තෝල කියලා. මේ දිග ආයුධයට කියන්නේ තුවක්කුව කියලා.
ඔහු සිය ආයුධ වලට වෙඩි බෙහෙත් පුරවන ගමන් පැවසුවා.
මොනවද මේවයින් කරන්න පුළුවන්?
ඔබ දුනු ඊතල ගැන දන්නවා නේද?
ඔව්.
මේවායින් දුනු ඊතල වලින් කරන කටයුත්ත කරන්න පුළුවන්. ඊට වඩා බලගතුයි. ඊට වඩා දුරට එල්ල කරන්න පුළුවන්.
මේ විස්තරයෙන් සෑහීමකට පත්වු එළීෂා නිහඩ ඒ දෙස බලා සිටියා. කාලය බිදෙන් බිද ගලා ගියා. පරිසරය මොහොතින් මොහොත අඳුරට නතු වෙමින් තිබුණා. දඩයක්කරු ඇතුළු පිරිසට සිය කාර්යය ඇරඹීමට සුදුසු කාලය ළඟාවෙමින් තිබුණා.
නිකෝලස්, නයෝමි, එළීෂා සුදානම් වෙන්න. හැකි තරම් සැහැල්ලුවෙන් ගමනට සුදානම්වෙන්න. අනවශ්‍ය දේවල් මුකුත් ගන්න එපා. ඒවා මෙතනම තබා යමු. වෙඩි තැබීමට අවශ්‍ය තරම් “කාටිරිජ්” අරගන්න.
ඔබ තිදෙනා ලෑස්තිද?
ඔව්. අපි ලෑස්තියි.
ලෝගන්, ඔබ තුවක්කුව ගන්නේ නැද්ද?
නෑ නිකොලස්. එයින් එතරම් ප්‍රයෝජනයක් වෙන එකක් නෑ. අවශ්‍ය වුනොත් ඔබේ තුවක්කුව පාවිච්චි කරමු. එළීෂා, පෙරමුණ ගන්න. පරෙස්සමින්. අපිට කිසිම එළියක් පාවිච්චි කරන්න විදිහක් නෑ. බොට්ටුවට ගොඩවන විට තුවක්කු හා “කාටිරිජ්” නොතෙමා ගැනීමට වග බලාගන්න. අත්‍යාවශ්‍යම දෙයකට හැරෙන්න කතා කරන්න එපා.
වැඩි වේලාවක් යාමට පෙර “ආත්මයන් නිදන විල” වෙතට පැමිණි ඔවුන් එළීෂා විසින් ආරක්ෂිතව සඟවා තැබු බෝට්ටුව එය සඟවා තැබු ස්ථානයෙන් එළියට ගෙන එය දියත් කළා. එළීෂාගේ මායා බලයේ ආධාරයෙන් යා යුතු වූ නිසි දිසානතිය සොයාගත් ඔවුන් පැයක පමණ කාලයකට පසුව සෙලීනා රාජිනියගේ මාළිඟය පිහිටියා වු “එවිග්” (Evig - සදාකාලික) නම් දූපතට පය ගැසුවා. ඔවුන්ගේ පැමිණීම බලාපොරොත්තුවෙන් එහි රැදී සිටි එළීෂාගේ වැඩිමහල් සහෝදරිය වු නීසාගේ සහයෝගයෙන් ඔවුන් පැමිණි බොට්ටුව කිසිවෙකුටත් නොපෙනෙන ලෙස සැඟවු ඔවුන් රහස් දොරටුවක් හරහා මාළිගය තුළට පිවිසුණා.
මාළිඟය ඇතුලතදී කාණ්ඩායම් දෙකකට බෙදුණු ඔවුන් තම තමන්ගේ ඉලක්කයන් කර ගමන් ගත්තේ මාළිඟය ඇතුළත වු රහස් මාර්ගයන් හරහා. නිකොලස්, නයෝමි හා නීසා මාළිඟයේ පොළෝ මට්ටමින් යට ඇති සිරකුටි කරාද ලෝගන් හා එළීෂා මාළිගයේ ඉහළම මට්මේ බල යෂ්ටිය තබා තිබූ අට්ටල්ල කරාද ගමන් ගත්තා.
රහස් මාර්ගය හරහා මාළිඟයේ ඉහළමට මට්ටමට පැමිණි ලෝගන් හා එළීෂා නිශ්ශබ්දවම අටල්ලට වැටී තිබුණු පටු කොරිඩෝරයට පිවිසුණා. එහිදී ඔවුන් දෙදෙනා දුටුවේ ඔවුන් බලාපොරොත්තු නොවු දසුනක්. පටු කොරිඩෝරය කෙළවරවූ අටල්ලට පිවිසෙන දොරටුව ඇර දමා තිබුණා. පටු කොරිඩෝරයේ සිට අටල්ල දක්වාම ඔවුන්ගේ පැමිණීම බලාපොරොත්තුවෙන් මෙන් සයිරන්වරුන් රැදී සිටියා. ඒ මොහොතේ ලෝගන්ගේ අතින් අල්ලාගත් එළීෂා, අසල වු තිරයක් පසු පසින් සැඟවුනේ කිසිවෙකුත් ඔවුන්ව දැකීමට පෙරයි.
ඒ නයෝමිවත් නිකොලස්වත් නම් නෙවෙයි.
කොහොමද එහෙම වෙන්නේ ලෝගන්. මගේම සහෝදරී මට මෙහෙම දෙයක් කරයිද?
ඒ ගැන දැන් වදවෙන්න බෑ. අපි කරන්න ආපු දේ කරමු.
ලෝගන්. එතන ඉන්න ආරක්ෂකයින් ප්‍රමාණය වැඩියි. අපිට බෑ උන් ඔක්කොම එක්ක සටන් කරන්න.
එළීෂා. ඔබට මාව විශ්වාසද?
ඔව්. මගේ ජීවිතයටත් වැඩියෙන්.
එහෙනම් එන්න මා සමඟ.
තමන් සැඟවී සිටි තිරය යටින් එළියට ආ ලෝගන්, එළීෂාවත් රැගෙන පටු කොරිඩෝරය පය තිබ්බා. තමන්ව පිළිගන්නට මෙන් එහි රැදී සිටින රෞද්‍ර පෙනුමැති ආරක්ෂකයින් ඔවුන් දෙදෙනාට දැකගන්නට ලැබුණා. එහි වු පටු කොරිඩෝරය ආරම්භවන තැන එළීෂාව රැදවූ ලෝගන් සිය උරහිස හරහා පැළද සිටි අසිපත් දෙක ගලවා එළීෂා අතට දුන්නා. අනතුරව තම ඉණ රැදී “කරම්බිට්” පිහි දෙක දෑතට ගත් දඩයක්කරුවා වේගයෙන් ආරක්ෂකයින් දෙසට දිවයන්නට ගත්තේ එළීෂාගේ සිත භීතියෙන් භීතියට පත්කරමින්. එම දසුන එළීෂා පමණක් නොව අටල්ලේ ආරක්ෂාවට සිටි සයිරන්වරුන්ද භීතියට පත්කරන්නට හැකිවූ දසුනක් වුනා.
තප්පර කිහිපයකින් ඉදිරියෙන්ම සිටි සයිරන්වරුන් දෙදෙනා වෙතට ළඟ වු ලෝගන් ඔවුන් අතක් ඉස්සීමටත් පෙර එකවරම ඔවුන් දෙදෙනාගෙම උගුරු දණ්ඩවල් කපා දැම්මා. ගෙළින් ගලා ගිය රුහිරු දහරා මතින් ගෙළ අල්ලා ගත් ඔවුන් බිම ඇද වැටුණේ නැවත දෙපයින් නැගිටීමට නම් නොවේ. ඊළඟ මොහොතෙදී වක් පිහි දෙක ඉණේ රදවා ගත් ලෝගන් තමන් වෙතට එමින් සිටි සයිරන්වරයාගේ නළල මැදටම තම දකුණතේ වු ෆිලින්ට්ලොක් පිස්තෝලය එල්ල කොට වෙඩි තැබුවා. ඊට පිටුපසින් ඉදිරියට ආ සයිරන්වරුන් තිදෙනාටම සිදුවුයේ ද ලෝගන් එල්ල කළ වෙඩි පහරවල් කා අවසන් ගමන් යන්නටයි. ඒ පහරවල් සියල්ලම වැදී තිබුණේ ඔවුන්ගේ නළල මැදටයි. පිස්තෝලවලට නැවත පිරවීමටවත් නතර නොවූ ලෝගන් ඒවා එහිම බිම අතහැර දමා ඉදිරියට ගමන් කළා.
ඊළඟ මොහොතේදී තමන් ඉදිරියට පිනූ සයිරන්වරයා එල්ල කළ පහර වම් පසට ඇළවී මඟ හැරිය ලෝගන් ඔහුගේ ගෙළට මාරක පා පහරක් එල්ල කළා. තමන්ගේ පපු පෙදෙසට එල්ල වු පිහි පහර දී සිය දකුණු අත යොදා වැළැක්වු දඩයක්කරුවා ක්ෂණයකින් වේගවත් මුෂ්ටි පහරක් සයිරන්වරයාගේ මුහුණට එල්ල කළා. එයින් තම සමබරතාවය ගිලිහී ගොස් ඇද වැටෙමින් සිටි සයිරන්වරයාට ලෝගන් එල්ල කළ පා පහරේ වේගයට සයිරන්වරයාගේ සිරුර විසිවී ගොස් බිත්තියේ වැදුණේ කොඳු ඇට කිහිපයක්ම බිද දමමින්.
ලෝගන් අටල්ලට ඇතුළු වුයේ නැවත වරක් සිය වක් පිහිදෙක දෑතට ගනිමින්. මේ වන විට අටල්ලේ වු ඉතිරිව සිටි සයිරන්වරුන් ඉමහත් භීතියට පත්වී සිටියේ ඔවුනට කිසිම දිනෙක් ලෝගන් වැනි වේගවත් මෙන්ම භයානක වු සටන්කරුවෙකු මුණ නොගැසී තිබූ බැවින්ය. ස්භාවයෙන්ම සයිරන්වරන් ශක්තිමත් හා බිහිසුණු සටන්කරුවන් ලෙස මෙතෙක් කල් නම් දරා තිබුණත් ලෝගන් ඉදිරියේ ඒවා පුස්සක් වී ගියා.
ලෝගන්, ඔබගේ ඇඟ පුරාම ලේ.
බයවෙන්න එපා. ඒ මගේ ලේ නෙවෙයි.
ඔබ කවුද ලෝගන්?
එළීෂා විමතියෙන් අසා සිටියා.
මම කිසිම දවසක මේ වගේ දෙයක් දැකලා නෑ ලෝගන්. සයිරන්වරුන් බිහිසුණු සටහන්කරුවන් විදිහටයි ප්‍රසිද්ධ. ඒත් ඔබ ඉදිරියේ ඔවුන්ට සිදුවු දේ මට හිතාගන්න බෑ. මට ඒ ගැන කියාගන්න වචන නෑ ලෝගන්.
ඒ ගැන අපි පස්සේ කතා කරමු. ඔබ ගිහිල්ලා බල යෂ්ටිය අතට ගන්න. අපි ඉක්මනින්ම පහළට යමු. අපේ අයට මොනවා වෙලාද කියන්න දන්නේ නෑ දැනටමත්. ඔබ කියන විදිහට කවුරුවත් හිතන්නේ නෑ අපි සයිරන්වරැන් සමඟ සටන ජය ගනී කියලා. අන්න ඒ නිසා අපිට තාමත් අවස්ථාවක් තියෙනවා. අපි ඉක්මන් කරමු.
එළීෂාගේ අතේ තිබු අසිපත් දෙක නැවත වරක් සිය උරහිස් හරහා දමා ගමින් ලෝගන් පවසා සිටියා. බල යෂ්ටිය තම අතට ගත් එළීෂා මොහොතකින් ලෝගන් වෙතට පැමිණියා.
දැන් අපි මොකද කරන්නේ ලෝගන්?
අපි යමු රැජිනව මරණයට පත්කරන්න සුදානම් කරලා තියෙන තැනට. හැමදෙනාම එතනට එන්න ඕන. ඔබ දන්නවද එතනට යන්න මාර්ගයක්.
ඔව් ලෝගන්. එන්න මාත් එක්ක.
පටු කොරිඩොව හරහා ඔවුන් නැවත ගමන් කරන අතර තුර නැවත වරක් සිට පිස්තෝල දෙක අහුලා ගත් ලෝගන් ඒවාට වෙඩි බෙහෙත් පුරවන ගමන්ම එළීෂා සමඟ ඉදිරියට ගමන් කළා. නැවත වරක් රහස් මාර්ගයකට පිවිසි ඔවුන් දෙදෙනා හිස ගසා දමන ස්ථානය ඉහළින් වු මහළට පැමිණියා. එහි සැඟවී සිට පහල බැලූ ඔවුන්ට දැක ගත වුයේ පහළ රැදී සිටින සියයක් පමණ වු පිරිසක්. එම පිරිසට ඉදිරියෙන් වු ස්ථනය රැජිනගේ හිස ගසා දැමීමට සුදානම් කර තිබුණා. එය වටා විසි පස්දෙනෙකු පමණ වු ආරක්ෂක පිරිසක් රැදී සිටියා. පහළ බිමෙහි වු අඳුර මැකීගොස් තිබුණේ තැනින් තැන දල්වා තිබූ පන්දම් වලින් නැඟුණු ආලෝක මඟිනි. ඉහල මාළය පුරාවටම දැල්වී තිබුණේ පන්දම් දෙකක් පමණක් බැවින් එය තරමක් අඳුරු ස්භාවයක් ගත්තා. එය ලෝගන්ගේ හා එළීෂාගේ කටයුතු වලට මහත් රුකුලක් වුනා.
මේ සෙනඟ කවුද?
ඔය රැජිනගේ සේවකයෝ, යටත් වැසියෝ. සෙබළු නෙවෙයි. ඔවුන්ට එන්න කියලා තියෙන්නේ රැජිනව මරා දමනවා බලන්න. එතකොට කවුරුවත් ඉදිරියට ස්ලෑන්ගාර්ඩ්ට විරුද්ධ වෙන්නේ නෑ කියලා ඔහු හිතනවා.
මේ සෙබළු පක්ෂපාත කාටද?
බොහෝ දෙනෙක් රැජිනට පක්ෂපාතයි. ඔවුන් ස්ලෑන්ගාර්ඩ්ට ඇති බිය නිසා ඔහුට පක්ෂපාත බව දක්වනවා. විශේෂයෙන් ඔහුගේ අඳුරු මායාවලට බයයි මොවුන්.
කොහෙන්ද රැජිනව මෙතනට අරගෙන එන්නේ?
අර පල්ලෙහා තියෙන ලොකු දොර පේනවා නේද ලෝගන්. අන්න ඒ දොරින්. එතනින් තමයි සිරකුටිවලට යන්න තියෙන්නේ.
සෙබළු ඔබ කියන දේ අහයිද?
මම මේ බල යෂ්ටිය අතේ තියන් ඉන්නවා දැක්කොත් බෙහෝ විට ඔවුන් මට ඇහුම් කන් දේවි. ඒත් ඔවුන් ස්ලෑන්ගාර්ඩ්ට එරෙහිව යන්න නම් ඉදිරිපත්වෙන එකක් නෑ. ලෝගන්, අපි දැන් මොකද කරන්නේ?
අර හිස ගසා දමන තැන පිටු පසට අපිට යන්න පුළුවන්ද?
ඔව් යන්න පුළුවන්. මාළිඟයේ මේ මහල නිර්මාණය කරලා තියෙන්නේ ඒක වටේටම ඇවිදන්න පුළුවන් විදිහට.
එළීෂා, ඔබට තියෙන්නේ රැජිනගේ හිස ගසා දමන්න සූදානම් වෙනකොටම මේ කෙටි තාප්පයට නැගලා ඔවුන්ගේ අවදානය වෙනස් වෙන්න යමක් කරන්න. ඔබට එය කරන්න පුළුවන්ද?
ලෝගන්, රැජිනගේ හිස ගසා දැමීමට සුදානම් කර තිබු ස්ථානයට ඉදිරියෙන්ම වාගේ ඇති කෙටි බිත්තියක් දක්වමින් පැවසුවා.
___________________________________________________________________________________
KB 2021.04.25
මෙසේ පැවසූ නයෝමිගේ මිත්තණිය මඳක් නිහඩවුනා. දිවා ආහාරයෙන් අනතුරුව ලෝගන්, නිකොලස්, නයෝමි හා ඇයගේ මිත්තණිය අතර වු කතා බහකදී නයෝමිගේ මිත්තණිය වු එසිල්ඩා මේ තොරතුරු ලෝගන් ඇතුළු පිරිසට පවසා සිටියා.
ඇයගේ මේ කුරුරිකම් තව දුරටත් දරාගෙන සිටින්නට බැරිවුණු ඇයගේ ප්‍රධාන ආරක්ෂකයා ඇයව බලයෙන් පහකිරීමට රහසිගතව කැරැල්ලක් ආරම්භ කළා. ඔහු දැනගෙන හිටියා ඇයගේ ශක්ති ප්‍රභවය ගැන. ඒ වගේම ඇයට සැම විටම පක්ෂපාතී වු “සයිරන්” භට පිරිස ගැන. අන්න ඒ නිසා ඔහු ඇයට විරුද්ධව, ඇයව බලයෙන් පහකරන්න යොදාගන්න පුළුවන් යම් අද්භූත බලයක් සෙව්වා.
ඔහුට එහෙම දෙයක් සොයාගන්න පුළුවන් වුනාද?
ඔව්, නිකොලස් පුතා. එහෙම විශේෂිත වු බලයක් සහිත වස්තුවක් තිබ්බා. එය නිල් මැණිකක්. එය සඟවා තිබුණේ රැජිනගේ මාළිගයේ පොළොව යට වු විශේෂිත කුටියක් තුළ. ඒ ගැන කිසිවෙක් දැනගෙන සිටියේ නෑ. අඩුම ගානේ රැජිණවත් මේ විශේෂිත වු නිල් මැණික ගැන දැනගෙන හිටියේ නෑ. එය සියලුදෙනාගේම මතකයන් අතරින් අමතකව ගොස් කාලයේ සුසාන භූමියේ සඳහටම වැළලිලා ගොස් තිබුණා. ඒත්, වාසනාවකට හෝ අවාසනාවකට එය ගැන සඳහන් කර තිබූ පැරණි පුස්තකයක් ස්ලෑන්ගාර්ඩ් හට සොයාගන්න හැකියාව ලැබුණා.
එහි තිබු උපදෙස් අනුව “එන්ඩ්‍රින්” (Endring) නමින් හඳුන්වනු ලැබූ මේ නිල් මැණික රැගෙන එන්නට මාළිගාවේ පොළොව මට්ටමට පහතින් වු කොටසට ඇතුල් වු ප්‍රධාන ආරක්ෂකයා ඇතූළු පිරිසෙන් ජීවිත බේරාගෙන එන්නට ලැබුණේ ප්‍රධාන ආරක්ෂකයාට විතරයි. අනිත් හැමදෙනාම මැණික සොරකම් කිරීමට එන්නන් වැළැක්වීමට යොදා තිබූ සියුම් උගුල් වලට හසුවී මියගියා. කෙසේ නමුත් ස්ලෑන්ගාර්ඩ් තමන්ගේ ජීවිතය බේරාගෙන මැණික රැගෙන එන්න හැකියාව ලැබී තිබුණා. එය ඔහු කෙසේ කළාද කියන්න කවුරුවත් දන්නේ නෑ. සමහරු කියනවා එයට ඔහු අඳුරු මායාවන් යොදාගත්තා කියලා. ඇත්ත මොකක්ද කියන්න කවුරුවත් දන්නේ නෑ.
නොයිවසිලිමත් වු නයෝමි සිය මිත්තණියගෙන් විමසා සිටියා.
මේ සිදුවීමෙන් දින කීපයකට පසුව ස්ලෑන්ගාර්ඩ් හා ඔහුට පක්ෂතපාතී සොල්දාදුවන් හා රැජිනට පක්ෂපාතී සොල්දාදුවන් අතර සටන ආරම්භ වුනා. එහි උච්ච වූ අවස්ථාවක එනම් රැජිනට ජය හිමිවෙමින් පැවති අවස්ථාවක ස්ලෑන්ගාර්ඩ් එන්ඩ්‍රීන් මාණික්‍යයේ බලය රැජිනට විරුද්ධව යොදාගත්තා. එහෙත් එයින් සිදුවුණේ කිසිවෙකුත් නොසිතූ දෙයක්.
ඒ මොකක්ද?
මෙතෙක් වෙලා නිහඩව සිටි ලෝගන් එසිල්ඩාගෙන් විමසා සිටියා.
ස්ලෑන්ගාර්ඩ්ට හමුවු පුස්තකයේ මේ එන්ඩ්‍රීන් මාණික්‍ය සතු බලය කුමන විදිහේ එකක් දැයි පැහැදිලිව ප්‍රකාශ කර තිබුණේ නෑ. ඒ මැණිකේ බලය බොහොම අද්භූත, නොසිතූ ආකාරයකට ක්‍රියාත්මක වුනා. එයට හැකියාව තිබ්බා හොඳ මිනිසුන් නරකට හරවන්නත් ඒ වගේම නරක මිනිසුන් හොඳ බවට පත් කරන්නටත්. හිතාගන්න පුළුවන් නේද වෙච්ච දේ? මැණිකේ බලයෙන් එය දරා සිටි ස්ලෑන්ගාර්ඩ් නම් වු ප්‍රධාන ආරක්ෂකයා අඳුරට නතු කළා. ඒ වගේම අඳුරට නතූවී සිට සිටි සඳ රාජිණියව ආලෝකයට නතු වුනා. මේ සටනේ අවසානයේ රැජින තම හිටපු ප්‍රධාන ආරක්ෂකයාගේ පිරිස පරාද කරලා ජයග්‍රහණය කිරීමට හැකියාව ලැබුණා. ඒත් රැජින සම්පූර්ණයෙන් වෙනස් අයෙකු බවට පත්ව සිටියා.
ඒ මොන විදිහටද?
ඒක සිතා ගැනීමට නොහැකි වෙනස් කරමක් ලෝගන්. ඇය කාලාන්තරයක් තිස්සේ ඇය සතුව තිබ්බ බල ලෝභය, ක්‍රෝධය, උඩඟුකම වගේ ලක්ෂණ තව දුරටත් ඇය සතුව තිබ්බේ නෑ. ඇය සම්පූර්ණයෙන් වෙනස් කෙනෙක් වෙලා තිබ්බා. ඇය තුළින් පහළවුයේ නැණවත්, ප්‍රතාපවත් රැජිණකගේ ලක්ෂණ. ඒ වගේම ඇයගේ හිටපු ආරක්ෂයා සම්පුර්ණයෙන්ම කණපිට පෙරලිච්ච පුද්ගලයෙක් වුනා. හරියට ඔහුයි රැජිණයි තමන්ගේ චරිත ලක්ෂණ මාරු කරගෙන තිබ්බා වගේ. රැජිනට තමන්ගේ හිටපු ආරක්ෂකයාට ජීවිත දානය දුන්නා. ඒත් ඔහුව සදාකාලයටම හිරකරලා තියන්න අණ කළා. ඒ වගේම ආයෙත් මෙවැනි දෙයක් නොවෙන්නට රැජින තමන්ගේ බලගතු යෂ්ටිය පාවිච්චි කරලා “ඒන්ඩ්‍රීන්” මාණික්‍ය විනාශ කරලා දැම්මා.
ආච්චි, ඔයා කොහොමද මේ හැමදෙයක්ම දන්නේ?
දරුවෝ, අපේ මුතුන් මිත්තෝ තමයි කාලාන්තරයක් තිස්සේ රැජිනගේ උපදේශකයෝ විදිහට කටයුතු කළේ. ඔවුනුත් මේ කැරැල්ලට සහයෝගය දුන්නා. ඒකට රැජින සමාව දීලා තවදුරටත් උපදේශකයන් විදිහට කටයුතු කරන්න ලෙස ඉල්ලා සිටියත් අපේ මුතුන් මිත්තෝ නැවත වරක් ඇයගේ උපදේශකයින් විදිහට කටයුතු කරන්නට කැමත්තක් දැක්වුයේ නෑ. ඔවුන් රැජිනගේ සේවයෙන් ඉවත්වෙලා මේ ගම්මානයට ආවා. පැරඩීස් ගම්මානය ගොඩ නැගුවේ ඔවුන්. ඒ තමයි එක් යුගයක අවසානය වගේම තවත් යුගයක ආරම්භය.
එතකොට දැන් මොකක්ද වෙන්නේ? ඔබ කොහොමද අපේ පැමිණීම දැනගෙන සිටියේ?
නිකොලස් සිය හඩ අවදිකරමින් එසිල්ඩාගෙන් අසා සිටියා.
මගේ සිහින අතරට ඇය පැමිණියා. ඇය තමයි මට ඔබලාගේ ආගමනය දන්වා සිටියේ. අප ඇයගෙන් ඉවත්ව සිටි කාලය අවසානයි කියා ඇය පැවසුවා.
ආච්චි අම්මා, ඔබට වයසයි. ඔබට පුළුවන්ද ඕවා කරන්න?
නෑ මම නෙවෙයි මේ කාර්යයට උරුමකම් කියන්නේ.
එහෙනම්? අපේ අම්මද? අම්මට මේවා ගැන කිසිම හැඟීමක් නෑනේ.
නෑ දරුවෝ. ඔබේ දෛවය තුළයි එය ලියවී ඇත්තේ. ඒ නිසයි ඔබේ සිහින අතරට ඇය පැමිණියේ.
මේ සමඟම පුදුමයෙන් පුදුමයට පත්වු නයෝමිට කිසිවත් සිතා ගැනීමට නොහැකිව ගියා.
මම කළින් කිව්වා රැජින “ස්ලෑන්ගාර්ඩ්” නම් වු තම ප්‍රධාන ආරක්ෂයාව සදාකාළයටම හිරකරන්න අණ කළා කියලා. ඒත් ඔහුව එහෙම හිර කරලා තියන්න පුළුවන් වුණේ ටික කාලයකටයි. ඔහු එක වරම අතුරුදහන් වුනා ඔහුගේ සිර කුටියෙන්. බොහෝ විට ඔහුත් සමඟ කැරැල්ලට එක්ව සිටි මාළිගාවේ සේවකයෙක්ගේ සහයෙන් වෙන්න පුළුවන්. ජන ප්‍රවාද වල තියෙන්නේ ඔහු තවදුරටත් අඳුරු මායාවන්හි පිහිට පැතු බව. අඳුරු මායාවන් තුළින් ඔහු තව දුරටත් සිය බලය වර්ධනය කරගත්තා කියලා තමයි පැවසෙන්නේ. මේ අඳුරු බලයන්ගේ පිහිටෙන් ඔහුට සිය ශරීරය පියාඹීමට හැකි හැකි පියාපත් යුගලක් සහිත සර්පයෙක් විදිහට වෙනස් කරගන්න පුළුවන් වගේම ඒ ස්වරූපයෙන් ඉතාමත් විෂ සහිත දූමයක් පිඹිමට ඔහුට හැකියාව තියෙනවා. රැජිනගේ නව දැක්මට ඇයගේ ආරක්ෂකයින් “සයිරන්” ජීවී කොට්ඨාශය එතරම් කැමත්තක් දැක්වූයේ නෑ. ඒ නිසා ඔවුන් අතර බෙදීමක් ඇති වුනා. ඔවුන්ගෙන් කොටසක් තවදුරටත් රැජිනට පක්ෂපතිත්වය දැක් වුවත් කොටසක් ඇයට කැමත්තක් දැක්වූයේ නෑ.
මට හිතාගන්න පුළුවන් මොකද වුනේ කියලා.
මම හිතන්නේ නෑ සමාන්‍ය ආයුධයකින් ඔහුව විනාශ කරදමන්න පුළුවන් කියලා. මට තේරෙන විදිහට ඔහු අඳුරු මායාවලින් ආරක්ෂිතයි. එම නිසා අපේ සාමාන්‍ය ආයුධ වලින් ඔහුට හානියක් කරන්න බෑ.
නැවත වරක් ඔබ හරි ලෝගන්. ඔහුව සාමාන්‍ය ආයුධයකින් විනාශ කරන්න බෑ. ඒ සඳහා විශේෂිත ආයුධයක් පාවිච්චි කරන්න ඕන. බොහොම කාලයකට පෙර ඕඩින්ගේ කම්මල්කරුවා වු එයිත්‍රි හා සියුස්ගේ කම්මල්කරුවා වන හෙපෙස්ටස් කියන දෙදෙනාව එකතු වෙලා අසිපතක් නිර්මාණය කරනවා කිසිවෙක් නොදන්නා නමක් නොමැති ලෝහයකින්. එය මේ විශ්වයේ ඈත කෙළවරකින් ලැබුණු ලෝහ කොටසක්. ඒ බොහොම ශක්තිමත් වගේම බලවත් ලෝහයක්. එම අසිපතේ මිට නිර්මාණක කිරීමට ඔවුන් කඟවේනෙක්ගේ අඟක් යොදාගන්නවා. අසිපතේ මිටේ කෙළවරට හා මිටට මදක් ඉහළින්
වු කොටසට සියස්ගෙන් ලැබුණු දම් පැහැති මැණික් කැට දෙකක් සවිකරනවා. ප්‍රවාද වල කියවෙන විදිහට මේ මැණික් කැට දෙක සියුස් හා සටන් වැදිලා මියගිය ටයිටන්වරයෙක්ගේ ඇස් දෙක.
මේ ඔක්කොම එකතු කරලා නිර්මාණය කරපු මේ බොහොම බලගතු අසිපතට ඔවුන් නමක් දෙනවා “ඉම්ෆීරියුම්” යනුවෙන්. මේ අසිපත අත දරන්නෙකුට විනාශ කළ නොහැකි අඳුරේ බලවේගයක් නෑ. සමහරු කියනවා එයින් ඕනෑම එළියේ හා අඳුරේ බලවේගයක් විනාශ කරන්න පුළුවන් කියලා. ඒත් ඒක සත්‍යයක් නෙවෙයි. මේ අසිපත කිසිදු එළියේ බලවේගයකට විරුද්ධව යොදාගත නොහැකියි. ඒ වගේම කිසිදු අඳුරේ බලවේගයකට එය අත දැරීමේ හැකියාවක් නෑ. ඒ වගේම සමාන්‍ය මිනිසෙක්ට එය අත දැරීමේ හැකියාවක් නෑ. එය අත දැරීමට හැකියාවක් ඇත්තේ විශේෂ තොරාගත් අයෙකුට.
දැන් කො‍හොද ඔය අසිපත තියෙන්නේ?
ඔය අසිපත තිබ්බේ අවසානයට තිබ්බේ සෙලීනා රැජින ගාව. ඒක තෑග්ගක් විදිහට ඇයගේ පියාට ලැබිලා තිබ්බා බොහොම කාලයකට පෙර. දැන් ඒක කොහෙද කියන්න කවුරුවත් දන්නේ නෑ මගේ රෝස මල.
ඒ කියන්නේ දැන් ඔය අසිපත කොහේ තියෙනවාද කියන්න කවුරුවත් දන්නේ නෑ. දැනගත්තත් වැඩක් නෑ. අපිට ඒක පාවිච්චි කරන්න හැකියාවක් නෑ.
අන්න එතන නම් ඔබ වැරදියි නිකොලස්. ඔබ හිතනවද මේ තරම් දුරක ඉඳලා ඔබලාව මෙහාට එන විදිහට වැඩ කටයුතු යෙදුණේ අහම්බයකින් කියලා? නෑ එහෙම නෑ. එය ඔබට ඉදිරියට දැනගත හැකිවේවි. අසිපත නියමිත වෙලාවට එය අත දරන්නා වෙතට පැමිණේවි. එය වැළැක්විය හැකි කිසිම බලවේගයක් මේ ලෝකයේ නෑ.
මේ සාකච්ඡාවට බොහෝ වේලාවක් ගතවී රාත්‍රියද එළඹ තිබූ බැවින් ඔවුන් මේ කතාව එතැනින් අවසාන කොට විවේකයක් ගැනීමට තීරණය කළේ පසු දින උදෑසනම ඔවුන්ට අලෝකයේ මං පෙත කරා පිටත්වීමට තිබු බැවිනි.
පසු දින උදෑසනින්ම ලෝගන්, නිකොලස් හා නයෝමි ආලෝකයේ මං පෙතට වු සිය තීරණාත්මක ගමන පිටත්වුයේ නයෝමිගේ මිත්තණියගේ ආශිර්වාදයත් සමඟයි. නයෝමිගේ මව හෝ පියා මේ ගමනට කිසිදු කැමත්තක් දැක්වුවේ නැතත් ඔවුන්ට සිය මවගේ කැමත්තට හිස නමන්නට සිදුවුනා. ආලෝකයේ මං පෙත පිහිටා තිබුණේ “පැරඩිස්” ගම්මානයේ සිට පැය කිහිපයක දුරින්.
පැය දෙක හමාරකට පමණ පසුව ලෝගන් ඇතුළු පිරිස ආලෝකයේ මං පෙතට ඇතුළු වන තැනට පැමිණියා. එය ආරම්භ වුයේ කඳු වැටි දෙකක් මැද්දෙන් දිවෙන කුඩා මාර්ගයකින්.
ලෝගන්, මෙතනින් තමයි ආලෝකයේ මං පෙතට ඇතුල්වෙන්නේ. මෙතනින් එහාට මොනවා තියෙනවාද කියන්න මම දන්නේ නෑ. ඔබ තාමත් පරක්කු නෑ. ඔබට කැමති නෑ ආපසු යන්න පුළුවන්.
එතකොට ඔබ?
මට ආපහු යන්න බෑ නිකොලස්. මට දැනෙනවා මේක මම යා යුතුම ගමනක් කියා. ඒක නිසා මට ආපසු හැරෙන්න හැකියාවක් නෑ. මම මේ ගමන යා යුතුමයි.
මටත් එහෙම තමයි නයෝමි. මම දැනෙන්නෙත් ඒ විදිහටමයි. සමහරවිට මම ආපසු නොඑන්නත් පුළුවන්. නිකොලස්, ඔබ මේ කිසිම දේකට සම්බන්ධ නෑ. ඔබට ආපසු යන්නට පුළුවන්.
මෙච්චර දුරක් ඇවිල්ලා ආපහු හැරිලා යන්න. ඒක නම් කීයටවත් වෙන්නේ නෑ. අනික දැන් තමයි අපි හොදම හරියට ඇවිල්ලා තියෙන්නේ.
නිකොලස් හා ලෝගන් දෙස නැවත වරක් හැරී බැලූ නයෝමි සිය අසු ආලෝකයේ මං පෙත වෙතට මෙහෙයවුවා. කිසිවක් නොදෙඩු ලෝගන් හා නිකොලස් ඇය පිටුපසින් සිය ගමන් කරන ලෙස සිය අසුන් මෙහෙයවන්නනට වුනා. පැය දෙකක පමණ කාලයක් ඔවුන් එක දිගටම මේ කඳු වැටි දෙක අතරින් වැටී තිබෙන මාර්ගය ඔස්සේ කිසිදු බාධාවකින් තොරව ගමන් කරන්නට වුනා. තවත් පැයකට පමණ පසු කඳු වැටි අතරින් වු මාර්ගය නිමා කරමින් කුඩා තණ බිමකට ඔවුන් එළඹියා. එය කෙළවර වුයේ මහා වනාන්තරයක් අද්දරින් වැටුණු කුඩා අඩි පාරක්.
කිසිවක් කතා බහකින් තොරවම තණ බිම පසු කළ ඔවුන් තිදෙනා වනාන්තරය හරහා වැටුණු කුඩා මං පෙත මැදින් ඉදිරියට ගමන් කරන්නට වුනා. එම මාර්ගය දිගේ විනාඩි පහළොවක් පමණ ඉදිරියට ගිය ඔවුන් එකවරම නැවතුනේ ඔවුන්ගේ ගමනට බාධා කරමින් මාර්ගය මැද සිටගෙන සිටි මිනිස් රුවක් දැකීමෙන්.
නයෝමිට පෙර සිය අසු පිටින් බැසගත් ලෝගන්, අනිත් අයට එලෙසම සිටින ලෙස සිය අතින් සංඥා කරමින් මාර්ගය මැද සිටින මිනිස් රුව වෙතට ගමන් කළේ ඕනෑම දෙයකට සුදානමින්. ලෝගන් මේ මිනිස් රුවට ඉදිරියට ගොස් රුවට අඩි දෙකක් පමණ දුරින් නැවතී දැඩි බැල්මක් ඒ අද්භූත රුව වෙතට හෙලුවා. ඊළඟ මොහොතේ බිමට නැඹුරු කරගෙන සිටි හිස එසවූ මේ රුව හිස ආවරණය කරගෙන සිටි දුහුල් පටලය මුදා හැර එක එල්ලේම ලෝගන්ගේ දෑස වෙත සිය දෑස යොමුකළා.
ලෝගන් ඉදිරියේ වුයේ රූමත් තරුණියක්. ඇගේ ශරීරය වැසී තිබුණේ විනිවද පෙනෙන තරමේ දුහුල් සළුවකින්. ඇගේ සුදු පැහැති සම අමුතු දිස්නයකින් බැබලුණා. ඇය සාමාන්‍ය මනුෂ්‍යයෙකුගෙන් වෙනස් වුයේ ඇගේ ශරීරය පිටුපසින් දක්නට ලැබු වලිගයකින්. ඇගේ කහ පැහැති කෙස් වැටිය දණ හිස් දක්වාම දික්වුනා. ඇය හිසේ මල් වලින් තැනූ ඔටුන්නක් පැළැද සිටියා. තවත් මොහොතක් ලෝගන් දෙස බලා සිටි ඇය සිය හඩ අවදි කළා.
එසේ නම් ගැළවුම්කරුවා පැමිණියා අවසානයේදී ආරක්ෂකයාත් සමඟින්ම !
මේ මා ගැන කීමට වෙලාව නෙවෙයි. එන්න මා පසුපස. අප සැම අනාරක්ෂිතයි. අප මෙතනින් ඉක්මනින් පිටවිය යුතුයි.
ඊළඟ මොහොතේ පටු මාවත හරහා නොව කැළය අතරින් ඇවිද යන්නට වු ඇය පසු පසින් ලෝගන් ඇතුළු පිරිස ගමන් කරන්නට වුනා. සාමාන්‍ය මිනිසෙකුට වඩා වැඩි වේගයකින් කැළය අතරින් ඇවිද ගිය ඇය ඔවුන්ව වනාන්තරයේ අභ්‍යන්තරයට ගෙන ගියා. එයින් අනතුරුව නැවත වරක් සිය ගමන් මාර්ගය වෙනස් කරමින් දකුණු දිසාවට ගමන් කරන්නට වුනා. මෙසේ එක දිගට පැය කීපයක් ගමන් කළ ඔවුන් ගංඟාවක් අසල වූ ගල් තලාවක් වෙතට ළඟා වුනා.
මෙතන ආරක්ෂිතයි. අපිට අද මෙතන විවේක ගන්න පුළුවන්.
ඔබ කවුද? කොහාටද අපිව එක්කගෙන ආවේ?
නැවත වරක් නයෝමි ඇගෙන් විමසා සිටියා.
උත්තමාවිය, මම එලීෂා. මා අප රැජිනියගේ යටහත් සේවිකාවක්. හරියටම කිවහොත් ඇයට පක්ෂපාතී, ඇය වෙනුවෙන් ජීවිතය දෙන්න පවා සුදානම් සේවිකාවක්. මම අයත් වන්නේ “හුල්ඩ්‍රා” යනුවෙන් හදුන්වන විශේෂිත වු සත්ත්ව කොට්ඨාශයට. අප සැම විටම ජීවයේ හා මරණයේ දේවතාවියගේ යටහත් සේවිකාවන්. මම ඔබලා වෙතට පැමිණියේ අප රැජිනගේ අණ පරිදි ඔබලා ඇයව සිරකර තබා සිටින තැනට ගෙන යාමටයි. එවිට ඔබලාට හැකිවේවි ඇයව මේ කරදරයෙන් මුදාගෙන අපේ බිමට නැවත වරක් සාමය ගෙන ඒමට.
ඇයි ඔබ මට උත්තමාවිය කියන්නේ? මම සාමාන්‍ය කෙනෙක්.
නෑ උත්තමාවිය. ඔබ තමයි අප රැජිනගේ අනාගත උපදේශකවරිය වගේම ප්‍රධාන ආරක්ෂිකාව වෙන්නෙත්. ඒ ගැන ඔබට ඉදිරියේදි දැනගන්නට ලැබෙයි. ඔබේ මිත්තණියගේ නම අප හැම අතරේ ප්‍රසිද්ධයි.
ඒකත් එහෙමද? මේ කොහෙද?
මේ මගේ නවාතැන. මම පමණයි මේ ගැන දන්නේ. ඒ නිසා ඔබ මෙතන ආරක්ෂිතයි උත්තමාවිය.
කරුණාකරලා මට උත්තමාවිය නොකියා නයෝමි කියා අමතන්න
මට එසේ කළ නොහැකියි.
ඔබ මා දෙන අණ පිළිගන්න බැදී සිටිනවා නේද?
එසේමයි.
එහෙමනම් මා අමතනකොට නයෝමි කියා අමතන්න. එය අණක්.
හොදමයි. ඔබලා මෙතන විවේක ගන්න. මම ඉක්මනින්ම ආපසු එන්නම්. ඔබලා කැමති නම් ගිනි මැළයක් දල්වා ගන්න. කිසිවෙකුට ඔබලාව සොයගත නොහැකියි.
කවුද අපව සොයන්නේ?
ඔබලාගේ පැමිණීම ගැන දැනටමත් ස්ලෑන්ගාර්ඩ් හට ඉව වැටී තිබෙනවා. අප අතරම ඔත්තුකරුවෙකු සිටින බව පෙනී යනවා. ඒ නිසාමයි මම තනියම ආවේ පෙර මඟට. ඔබලා ගැන දන්නේ මා පමණයි.
මේසේ පැවසු අඳුරු වනය අතරින් නොපෙණී ගියා. ඇය නොපෙනී ගිය පසු ගල් තලාව මත අසුන් ගත් නයෝමි,
නිකොලස් මොනවද දන්නේ මේ “හුල්ඩ්‍රා” කියන ජීවින් ගැන?
“හුල්ඩ්‍රා” ගැන කතා කරන්නේ නොරිස්, ස්විඩන් ජන හා මිත්‍යා කතා වල. මේ විශේෂයේ ඉන්නේ කාන්තාවන් හා පිරිමින් යන දෙගොල්ලම දකින්න පුළුවන්. වැඩිපුරම කියවෙන්නේ කාන්තාවන් ගැන. වලිගෙන් ඇරෙන්න අනිත් හැම දෙයකින්ම මිනිසුන්ට සමානයි. සමහර තැන්වල තියෙනවා ඔවුන්හට පිරිමින්ව මුළා කිරීමේ හැකියාව තියෙනවා කියලා. සමහර තැන්වල ඔවුන් වනයේ ආත්මයන් ලෙසත් දක්වලා තියෙනවා. තමන්ට ලැබෙන ගෞරවය, සැළකිල්ල ඔවුන් බොහොම වැදගත් කොට සලකනවා කියලා තමයි පොත් වල තියෙන්නේ.
නයෝමි, නිකොලස්, අපි එලීෂා ගැන වැඩි විස්තර දන්නේ නැති නිසා හැම විටම කල්පනාවෙන් ඉන්න එක හොදයි. අපි දන්නේ නෑ ඇය ඇත්තටම රැජිනටද එහෙම නැත්නම් ස්ලෑන්ගාර්ඩ්ටද වැඩ කරන්නේ කියලා.
ඒක හරි ලෝගන්. අපි කිසිම අවිශ්වාසයක් පෙන්වන්න හොද නෑ. එහෙම නේද උත්තමාවිය?
නිකොලස්, ඒ පාර ඔබත් පටන්ගත්තද මට උත්තමාවිය කියන්න?
එයට කිසිවක් නොකියා සිනාසුණු නිකොලස් මෙන්ම ලෝගන්ද ගල් තලාවේ අසුන්ගත්තා.
පැයකට පමණ පසු වනය අතරින් ඇදී එන අඳුරු රුවක් ඔවුන්ගේ නෙත ගැටුණා. අසිපත අතට අතට අරගත් ලෝගන් නැගී සිටියා. අඳුරු අතරින් ඇදී එන්නේ එලීසාගේ පමණක්ම බව තහවුරු කරගත් ඔහු නැවත වරක් ගල් තලාව මත අසුන් ගත්තා.
විනාඩි කීපයකට පසු ඔවුන් පෙතට පැමිණි ඇය ලෝගන් ඉදිරියේ දණ ගසාගෙන් ඔහුට යමක් පිළිගන්වා සිටියා. ඇගේ අතේ වුයේ අඩි තුන හතරක් පමණ දිගකින් හා අඟල් පහක පමණ පළලින් වුත් ලී පෙට්ටියක්.
මේ මොකක්ද? වහා නැගී සිටිමින් ලෝගන් ඇයගෙන් විමසා සිටියා.
කිසිවක් නොපැවසූ ඇය එලෙසින්ම නිසොල්මන්ව සිටියා.
ලෝගන් තමාට පිළිගැන්වු ලී පෙට්ටිය එක් අතකට ගනිමින් අනිත් අතින් ඇයව නැගී සිටවමින් පවසා සිටියා.
මා දන්නේ නෑ. මට මෙය අපේ රැජිනිය ඔබ වෙතට ලබාදෙන ලෙස පවසමින් මට ලබාදුන්නේ. එය අපේ ඉදිරි වැඩ කටයුතු වලට අත්‍යාවශ්‍ය දෙයක් වන බව පමණක් මා හට පවසා සිටියා.
හරි. දැන් ඔබ මෙතනින් වාඩිවෙලා විවේක ගන්න. අපි ගෙනාපු කෑම තියෙනවා. ඔබට කුසගිනිත් ඇති. හැබැයි අපි දන්නේ ඔබ අපේ ආහාර අනුභව කරනවද කියලා.
ස්තූතියි උතුමාණෙනි.
නයෝමි කියපු දේ තමයි මටත් කියන්න තියෙන්නේ. මම ලෝගන්. මේ නිකොලස්. අර නයෝමි. ඔබට අපිව ඒ විදිහට අමතන්න පුළුවන්. මෙතන උතුමාණන්ලා හෝ උත්තමාවියන් නෑ. එපමණයි.
එයට ඇගේ දිලිසෙන දැස් බබළමින් සිනාසුණු ඇය ලෝගන් අසුන්ගෙන සිටි තැන අසලින්ම අසුන්ගෙන ආහාර ගන්නට පටන් ගත්තා. නැවතන් තමා කළින් අසුන්ගෙන සිටි තැනින්ම අසුන්ගත් ලෝගන් තමා අතේ වු ලී පෙට්ටිය විවිර කළා. එය වෙතට දෑස් කළ හැමෝටම දක්නට ලැබුණේ රෙදි කඩකින් ඔතා තිබු දිගු අසිපතක්. එය ඔතා තිබු රෙදි කඩ ඉවත් කළ ලෝගන් ඇතුළු පිරිසට දැකගන්නට ලැබුණේ පෙර දිනයේදි නයෝමිගේ මිත්තණිය විස්තර කළ “ඉන්ෆීරියුම්” අසිපතයි.
නැවත වරක් නැගී සිටි ලෝගන් අසිපත එය දමා තිබු පෙට්ටියෙන් එළියට ගත්තා. අසිපත දවටා තිබ රෙදි කඩ ඉවත් කළ ඔහු අසිපත එය බහා තිබූ හමින් නිමකළ කොපුවෙන් මුදවා ගත්තා. අසිපත නිසි පරිදි සිය දෑතින්ම අල්ලා ගත් ඔහු එයින් ගුවනට පහරවල් කීපයක් එල්ල කළා. ඔහු එය දකුණු අතින් වම් අතටද වම් අතින් දකුණු අතටද මාරු කරමින් සිය ශරීරය වටා කර කවන විට එහි මිටේ ආසන්නයේ ඔබ්බවා තිබූ මැණික් කැට යුගලය දම් පාටින් දිලිසෙන්නට පටන් ගත්තා. අනතුරුව අසිපත නැවතත් එහි කොපුවට දැමු ලෝගන් එය රෙදි කඩෙන් ඔතා ගල් තලාව මත තැබුවා.
මතකද නයෝමිගේ මිත්තණිය කියපු දේ?
ඒ මොකක්ද?
එසේ නිකොලස්ගෙන් විමසා සිටියේ මෙතෙක් වෙලා එක තප්පරයකටවත් ලෝගන් වෙතින් සිට දෑස් ඉවතට නොගත් එළීෂා.
මගේ ආච්චි කිවුවේ මේ අසිපත නිසි වෙලාවට එය අත දරන්නා වෙතට පැමිණේවි කියලා. මට පේන්නේ ඒක ඒ විදිහටම වෙලා කියලා. ලෝගන්, ඔබට මොනවද දැනුනේ අසිපත අතේ තියෙන විට?
අසිපත මගේම කොටසක් කියලා තමයි දැනුණේ. එය මටම කියලා හදපු එකක් වගේ. අසිපත හරියටම සමබර කරලා තියෙනවා. වේගයෙන් හා පහසුවෙන් හසුරවන්න පුළුවන්.
එහෙම වෙන්න ඕනනේ. දෙවිවරු දෙදෙනෙක්ගේ කම්මල්කරුවන් එකතු වෙලා නිර්මාණය කරපු අසිපතක්නේ මේක.
ඒක හරි නිකොලස්. එළීෂා, අපේ ඉදිරි වැඩ කටයතු ගැන අදහසක් තියෙනවද ඔබට?
ලෝගන් නැවත වරක් ගල් තලාවේ අසුන් ගනිමින් එළීෂාගෙන් විමසා සිටියා.
ඔව්.
සිය ආහාර ගැනීම නිමාකර සිටි එළීෂා ලෝගන්ට තවත් ළං වෙමින් පවසා සිටියා. ඇගේ කොළ පැහැති ඇති දිදුලන්නට වුනේ කුමක් නිසාදැයි කාටවත් සිතාගන්නට කිසිවෙකුටත් නොහැකි වුනා.
හෙට රාත්‍රියේදී මගේ රැජිනව මරා දමන්නට නියමිතයි. ඇය සතු බලය සම්පූර්ණයෙන්ම වාගේ ස්ලෑන්ගාර්ඩ් විසින් අත් කරගෙන අවසානයි. හෙට රාත්‍රීය වන විට මේ කටයුත්ත සම්පූර්ණ වෙන බව තමයි දැනගන්නට තියෙන්නේ. රැජින ජීවත්ව ඉදීම ඉදිරියට ලොකු තර්ජනයක් විය හැකි නිසා එය අවසාන වු විගසම ඇයව මරා දමන්නට තමයි ස්ලෑන්ගාර්ඩ් අණ දී තිබෙන්නේ. අපිට හෙට දහවල් වන විට “ආත්මයන් නිදන විල” වෙත ළඟාවෙන්න පුළුවන්. ඒ විලේ මැද තියෙන දූපතේ තමයි රැජිනව හිරකරලා තියෙන්නේ. දූපතට යන්න අවශ්‍ය දේවල් අපි ලෑස්ති කරලා තියෙන්නේ. අපිට ඉස්සෙල්ලම කරන්න තියෙන්නේ මාළිගයේ ඉහළම අටල්ලේ රදවලා තියෙන බල යෂ්ටිය ලබාගන්න එක. එතන ආරක්ෂාවට සයිරන්ලා සිටිනවා. මාළිගයේ ඉහළ අටල්ලට යන්න රහස් පාරක් තියෙනවා. අපි කීප දෙනෙක් පමණක් දන්න. බල යෂ්ටිය රැගෙන අපි රැජිනව බේරගන්න සිර මැදිරියට යන්න ඕන. අපිට සහය දෙන්න පිරිසක් මාළිගය තුළ සිටිනවා. මේක තමයි අපේ සැලැස්ම. මොකද ලෝගන් ඒ ගැන කියන්නේ?
සැලැස්ම නම් හොදයි. ඒත් ගතවෙන කාලය වැඩියි. මම හිතන්නේ අපි දෙකට බෙදිලා ගිහිල්ලා එක තැනකදී එකතු වුනොත් හොදයි. නැත්නම් මේ සැලැස්ම සාර්ථක වෙන්න තියෙන ඉඩ කඩ අඩුයි. කොතනද ආරක්ෂාව වැඩි?
ඉහළ අටල්ල තුළ ආරක්ෂාව වැඩියි. එතන ආරක්ෂාවට සයිරන්ලා දස දෙනෙක් පමණ යොදවා තිබෙනවා. සමහර විට ඊට වඩා වැඩි වෙන්නත් පුළුවන්. සිරකුටිවල නම් එතරම් ආරක්ෂාවක් නෑ. මොකද රැජින බලයෙන් පිරිහිලා තියෙන නිසා ඔවුන් ඒ ගැන වැඩි අවදානයක් යොමු කරලා නෑ.
තව ඔබට විශ්වාසවන්ත කෙනෙක් ඉන්නවද එළීෂා? විශේෂයෙන් සිර කුටියට යන පාර දන්න කෙනෙක්?
ඔව්. මගේ සහෝදරිය සිටිනවා.
හරි. අපි කාණ්ඩායම් දෙකකට බෙදෙමු. නිකොලොස්, ඔබ නයෝමි හා එළීෂාගේ සහෝදරිය සමඟ සිර කුටියට ගොස් රැජිනව මුදාගන්න. මම එළීෂත් සමඟ ඉහළ අටල්ලට යන්නම්.
එතන ඉන්න ආරක්ෂකයන් ප්‍රමාණය වැඩියි ලෝගන්. අපිට තව කට්ටිය අවශ්‍ය වේවි.
එළීෂා, ඔබ ඒ ගැන වද වෙන්න එපා. ලෝගන් ඒ ගැන බලා ගනීවි. අපි එකතු වෙන්න ඕන කොතනදිද?
හොදම තැන රාජකීය මණ්ඩපය. එතන තමයි රැජිනගේ පාලන මධ්‍යස්ථානය. එතනට එන්න රහස් මාර්ග තිබෙනවා අටල්ලේ සිට වගේම සිරකුටිවල සිටත්.
මේ වෙලාවට ස්ලෑන්ගාර්ඩ් කොතනද ඉන්නේ?
ඔහු අනිවර්යයෙන්ම එළියේ දඩුවම් දෙන තැන තමයි ඉන්නේ. ඔහුට අවශ්‍යයි හැමදෙනාටම රැජිනගේ අවසානය දැක ගැනීමට සලස්වන්න. එය ඔහුට එරෙහි වෙන ඕනෑම කෙනෙක්ට වෙන දේ කියලා දන්වන්නයි ඔහුට අවශ්‍ය වෙලා තියෙන්නේ.
ඔහුට තියෙන සහයෝගය කොහොමද? කවුද ඔහුට උදව් කරන්නේ?
සයිරන්වරුන්ගෙන් කුඩා කොටසක් තමයි ඔහුට සහයෝගය දක්වන්නේ. බොහෝ දෙනෙක් තම ජීවිතය බේරා ගැනීමට ඔහුට සහය දෙනවා. රැජින නැවත පැමිණියොත් ඔවුන් නැවත වරක් රැජිනට සහයෝගය දේවි.
එහෙම වුනොත් හොදයි. අපි හිතමු මේ දේ අපිට මේ කාර්යය සාර්ථකව කරගන්න ඉඩ ලැබේවි කියලා. එහෙම නැති වුනොත් හැමෝටම මැරෙන්න තමයි වෙන්නේ.
අපි සාර්ථක වේයි කියලා පතමු. ඒ අතරම නරකම දේටත් සූදානම් වෙමු.
අපි උදෑසනින්ම ගමන ආරම්භ කරමු. ඒ නිසා දැන් අපි නින්දට ගියොත් හොඳයි. මම පළමුවෙන්ම අවදිව සිටින්නම්.
අවදිව සිටින්නට අවශ්‍ය නෑ ලෝගන්. මම මේ අවට ආරක්ෂා කරලා තියෙන්නේ. ඒ නිසා අපිට කිසිම කරදරයක් වෙන්න ඉඩක් නෑ. බය නැතුව නින්දට යන්න. කවුරු හරි ආවොත් කල් ඇතුව මට දැනෙනවා.
ඔබ හරිම දක්ෂයෙක්නේ එළීෂා.
ස්තූතියි උත්තමාවිය.
නයෝමිගේ ප්‍රශංසාවෙන් මඳක් ලැජ්ජාවට පත් එළීෂා පැවසුවා.
මම දැන් සැරයක් කිවුවා නේද මට උත්තමාවිය කියන්න එපා කියලා. ඊළඟ පාර මම දෙනවා දඩුවමක්.
එය සිනහවෙන් පිළිගත් ඇය ගල් තලාව අසල බිම දිගාවී නින්දට යන්නට සූදානම් වුනා. අනිත් අයත් එලෙසම ගිනි මැළය වටා නින්දට පිවිසියා. අවට පරිසරයම ගැඹුරු නිහඩතාවයක ගිලී යන්නට ගතවුයේ විනාඩි කීපයක් පමණයි. ඒ නිහඩතාවය මදකින් හෝ බිදී ගියේ ගිනි මැළයේ වු දර පුපුරු බිදී යන ශබ්දයෙන් පමණයි.
පැය කිහිපයකට පසු නින්දෙන් පිබිදුණු එළීෂා අඳුර මැදින් සිය දිලිසෙන කොළ පැහැති දැස් විදහා බැලුවා. අනතුරුව තමන් නැගී සිටි තැනින් නැගිටගත් ඇය ලෝගන් අසලට පැමිණ ලෝගන් දෙස මොහොතක් බලා සිටියා. අනතුරුව ඒ අසලින්ම දිගාවූ ඇය ලෝගන්ට තුරුළු වී නින්දට පිවිසියා.
___________________________________________________________________________________
KB 2021.04.11
