විදී නාට්‍යය

     

පහුගිය දවසක බර්ටියා වැඩ කරන ජාත්‍යන්තර පාසල පා ගමනක් සංවිධානය කලා‍. ඒකේ තේමාව “දරුවා සුරකිමු” කියන තේමාවයි. ඇත්තටම ඒක තුළින් අපි කියන්න හැදුවේ දැන් කාල‍ේ හැදෙන ළමයින්ට අන්තර්ජාලය තුළින් මෙන්ම සමාජය හා වැඩිහිටියන්ගෙන් වෙන අකටයුතුකම් ගැන කතා කිරීම‍. මේ තුළින් දරුවන් අපහරණය, මත් ද්‍රව්‍ය, අන්තර්ජාලයට හා ජංගම දුරකථනයට ඇති ඇබ්බැහිය, Cyber Bulling (මේකට යොදන්න පුළුවන් සිංහල වචනයක් බර්ටියා දන්න‍ේ නෑ) වගේ කාරණා‍ තමයි කතා කලේ‍. වැස්ස නිසා පා ගමන සියයට සියයක්ම සාර්ථක නොවුනත් යම් තරමක හෝ පණිවිඩයක් සමාජයට දෙන්න ඇති කියලා අපි බලාපොර‍ොත්තු වෙනවා‍. බර්ටියා මෙතන පා ගමන ගැන ලියන්න නම් යන්නේ නෑ. බර්ටියා ඇතුළු පිරිස ඒ වෙනුවෙන් කළ වීදී නාට්‍යය‍ේ තිර රචනාව දාන්න තමයි අදහස. මේක බර්ටියා තනියම ලියපු එකක් නම් නෙමෙයි. ‍මේක බර්ටියාගෙයි, සිතාරා ටීචර්ගෙයි, ලකික සර්ගෙයි එකතුවේ ප්‍රථිපලයක් කිව්වොත් තමයි හරි. අපි කට්ටියම ගොඩක් මහන්සි වුනා (නාට්‍යයේ රඟපෑව ළමයිනුත් ඇතුළුව) මේ වීදී නාට්‍යය වෙනුවෙන්. නාට්‍යයේ කතාව ගලාගෙන යන්නේ මෙන්න මෙහෙමයි.

තාත්තෙක් හා පුතෙක් අතර ඇති වන කතාබහක්. ඈතින් යන කොලු ගැටයෙක්
තාත්තාඃ   ලොකු පුතේ, අර ඇට සැකිල්ල වගේ පාරේ ඇවිදගෙන යන කොලුවා කව්ද?
පුතාඃ  ආ............ ඒ අර සෙමනේරිස් මාමගේ පුතා නොවැ.
තාත්තාඃ   මොන සෙමනේරිස් ද ලොකු එකෝ?
පුතාඃ  ඇයි තාත්තේ? මතක නැද්ද අර මී කතුරට අහු වෙලා මළේ . තාත්තාට මතක නැද්ද අපි මළ ගෙදරටත් ගියේ.
තාත්තාඃ   ආ හරි හරි. ඒ දවස් වල ජපන් බෝනික්කා ‍වගේ හිටපු කොලු‍වා නේද ඔය? හැබැටම මොකක්ද පුතේ ඔය
    කොලුවට වෙලා තියෙන්නේ? බට කුඹල ‍වගේ කෙට්ටු මොකද ඒකා?
පුතාඃ  ඇයි තාත්තේ ඔය කොලුවා කුඩු ගහනවනේ. ඒකයි ඔය දිරලා ගිහිල්ලා තියෙන්නේ.
තාත්තාඃ   එහෙනම් ඔය කොලුවට රස්සාවක් වත් කරන්න බැරුව ඇති. කොහෙන්ද ඕවා ගන්න සල්ලි?
පුතාඃ  හොරකම තමයි ඉතින්. ගිය සතියෙත් අර පල්ලෙහා ගෙදර වත්තේ කෙහෙල් කැනක් කපලා අහු වුනානේ.
    හැම තිස්සේම ඒකා රණ්ඩු කරනවා ගෙදර මිනිස්සු එක්ක කුඩු ගහන්න සල්ලි ඉල්ලලා. දැන් වැලක
    රෙද්දක් වත් තියා ගන්න බැරි වෙලා තියෙන්නේ.
තාත්තාඃ   මොනවද හැබැටම ඔය කුඩු කියලා ගහන්නේ? අපේ කාලේ ආව ගංජා දැන් වෙන නමකින් වත් ඇවිල්ලද?
පුතාඃ  ඒවට දැන් කියන්නේ KG කියලා, තාත්තේ. කුඩු කියන්නේ සුදු පාට කුඩක්. ඒක හදන්න ගන්නේ පොපි
    කියලා පැලයක හැදෙන ගෙඩියකින් ගන්න කිරි වලින්.
තාත්තාඃ   හැබෑටම ලොකු එකෝ?
පුතාඃ ‍ ඔය කුඩු වල ජාති ගොඩක් තියෙනවා තාත්තේ. හෂීෂ්, මරිජුවානා, හෙරොයින් ‍වගේ එක එක නම් වලින්
    එන. කුඩු බිව්ව එකා පිස්සුවෙන් වගේ ආයේ අයෙත් කුඩු හොයනවා. ඕවා ගත්තහම අමුතු අමුතු දේවල්
    පේනවලු, බිත්ති ‍දිගේ යන කාර්, වහල දිගේ යන මිනිස්සු වගේ එක එක ඒවා. ඉගෙන ගන්න වැඩක්
    කරගන්නත් බෑ. මෙලෝ දෙයක් මතක හිටින්නෙත් නෑ. නිතරම ලෙඩ ගාණේ තමයි.
තාත්තාඃ   අනේ අම්මපා ! හරිම භයානකයි නේ.
පුතාඃ  ඔයිටත් වඩා භයානක දේවල් තියෙනවා තාත්තේ. දැන් අළුත්ම ජාතියක් තියෙනවා ක්‍රිස්ටල් මෙත් කියලා.
    සමහරු ඒකට අයිස් කියලත් කියනවා. ගත්තොත් ගත්ත එකා ඉවරයි. පහු ගිය දවසක ගෑණු දෙන්නෙක්ව
    පොලිසියෙන් අල්ලගත්තා ඉස්කෝලයක් ගාව ඕවා විකුණලා.
තාත්තාඃ   මේ මිනිස්සු සල්ලි හොයන්න කරන විනාසයක්. මේ ර‍ටේ අනාගතේ නේ විනාස වෙන්නේ මේ වැඩ
    වලින්. ඕවා පාවිච්චි කරන අය බේරගන්න ක්‍රමයක් ඇත්තෙම නැද්ද පුතේ?
පුතාඃ  බේර ගන්න නම් ගොඩක් මහන්සි වෙන්න ඕන. ඔය කුඩු ගහන අයට නම් ඒකෙන් එන භයානක ප්‍රතිඵල
    නවත්තලා කුඩු නැති වුනහම එන අමාරුව අඩු කරන්න බේත් පෙත්තක් දෙනවා මෙතඩොන් කියලා.
    හැබැයි ඒවා දොස්තර මහත්තයෙක්ගේ අනු දැනුම ඇතිව ගන්න ඕන‍.

තාත්තගේ හා පුතාගේ කතාව මැදට පනින මිනිපිරිය selfie ගෙන ෆෝන් එක ඔබ ඔබා යන්න යයි
තාත්තාඃ   අපේ කෙලීව ඇස් දෙක වගේ බලා ගන්න ඕන මගේ පුතේ. ඒකිගෙත් දැගලිල්ල මේ ළඟකදී ඉදලා
    හොදටම වැඩියි.
පුතාඃ  මම ඒ ගැන කල්පනාවෙන් ඉන්නම් තාත්තේ. අපි යමු තේ ටිකක් බොන්න.
තාත්තාඃ   ඒක නම් හොද අදහසක් !

මිනිපිරිය පාඩම් කරමින් සිටී. ඇය අත ජංගම දුරකථනයක්. පසෙකින් ‍ෆේස්බුක්
(ඔර්ලෝසුව - වේලාව සවස 6.00)
ෂැන්ඩ්‍රියාඃ   අනේ ෆේස් බුක් මට පාඩම් කරන්න දෙන්නකෝ !
FB:   පාඩම් නම් කොයි වෙලාවේ කරගන්න බැරිද ළමයෝ? මේ බලන්නකෝ අනුස්කා ෂර්මාගේ අළුත්ම
    ෆොටෝස් ටික. ෂැන්ඩ්‍රියාඃ   ආනේ....... අනුස්කා ද? මගේ favorite ම නිළිය අනේ. කෝ කෝ .........?
FB:   ඔය ඔය YouTube video එකකුත් තියෙනවා.
ෂැන්ඩ්‍රියාඃ   හානේ ............. ඔව්මයි ! ‍Sooooo Coooool මෙයා ...........!

ඒ සමඟම ෆේස්බුක් පිටවන අතර යු-ටියුබ් කරලිය
(ඔර්ලෝසුව - වේලාව රාත්‍රී 8.30)
ෂැන්ඩ්‍රියාඃ   හැබැයි YouTube මේ Video එක විතරමයි. ආයේ මට කරදර කරන්න එපා. ඊයෙත් මම අපේ
    බ‍යෝ සර්ගෙන් හොදටම බැනුම් ඇහුවා පාඩම් කරලා නෑ කියලා. තාමත් මගේ කන් දෙක
    රිදෙනවා ඒ බැනුම් වලට.
YouTube:  හරි හරි අනේ එක දවසක් බැනුම් ඇහුවා කියලා ඔයාට පාඩුවක් වෙන්නේ නෑ නේ
ෂැන්ඩ්‍රියාඃ   අනේ අද නම් බෑ. අපේ ඉංග්‍රීසි ටීචර් මාව මරයි !
YouTube:  බලන්න ගිරාජ් ගේ අළුත්ම එක. සින්දුව නම් මෙලෝම රහක් නෑ. වීඩියෝ එක නම් මල් හතයි.
ෂැන්ඩ්‍රියාඃ   අපෝ ඔය ඇති YouTube දැන් නම් මට පාඩම් කරන්න ඕන. ඔයා යන්න දැන්
YouTube:  නෑ නෑ තව එක වීඩීයෝ එකයි. මේ සිහාන්ගේ අළුත්ම මියුසික් විඩියෝ එක
ෂැන්ඩ්‍රියාඃ    හානේ ........... ශිහාන් ................ මං මඟ බලාගෙන හිටියේ ඔය විඩියෝ එක එනකම්
       සුවඳක් වෙලා ඔබ සොයා එන්න ඕනේ
       සෙවනැල්ල වාගේ ඔබ ළගීන් ඉන්න ඕනේ
     මම මේක දැන් මම අයිෂාට කියන්න ඕන

ෂැන්ඩ්‍රියාගෙන් අයිෂාට වයිබර් ඇමතුමක් සමඟ වයිබර් කරළියට
(ඔර්ලෝසුව - වේලාව රාත්‍රී 10.00)
ෂැන්ඩ්‍රියාඃ   හානේ කෙල්ලේ අයිෂා ! සිහාන්ගේ අළුත් ම සින්දුව ඇවිල්ලා මෙයා
අයිෂාඃ  ආනේ මේ අපේ පොල් කඩන සිහාන් අයියගේ? ඔයා කොහොමද දන්නේ? ඒකට පද දෙකක් ‍වත් ගලපලා
    කියා ගන්න බෑනේ?
ෂැන්ඩ්‍රියාඃ   පොල් කඩන සිහාන් නෙමෙයි ‍මොඩියේ ! සින්දු කියන ශිහාන්, අර කොණ්ඩෙ දිගට වවලා කරාබුවක්
    දමලා අණ්ඩ දැමූ කලිසම ඇඳලා ඉන්නේ අනේ.
අයිෂාඃ  ආනේ ඒ සිහාන් අයියද?
ෂැන්ඩ්‍රියාඃ   ඔව් සුදු. මං මේ YouTube විඩියෝ එක බලන ගමන්මයි ඔයාට කතා ‍කලේ. එයා හරිම සුවිට් අනේ
Viber:   මේ මේ මං අළුතෙන් ස්ටිකර් පැක් එකකුත් දැම්මා .............. නිකම් නෙමෙයි සද්දෙත් එක්ක.
     ඒක බලන්නකෝ ...................
ෂැන්ඩ්‍රියාඃ   ඔන්න මං ඔයාට අලුත් ස්ටිකර් එකකුත් එව්වා. මේ අයිෂා ඔයා දන්නවද වැඩක් කෙල්ලේ? මං අද
    කොණ්ඩේ කැපුවනේ අලියා බාත් වගේ. මං ෆො‍ටෝ එක Insta දාන්නම්. හොද කෙල්ල
     වගේ ඒකට ලයික් කරලා ලස්සන comment එකකුත් දාන්න ඕන හොදේ?
අයිෂාඃ  බායි කෙල්ලේ එහෙනම්. ටටා .....................

(ඔර්ලෝසුව - වේලාව මධ්‍යම රාත්‍රී 12.00)
ෂැන්ඩ්‍රියාඃ   අයි‍යෝ මට එක Homework එකක් වත් කරගන්න බැරි වුනානේ. දැන්නම් හොදටම මහන්සියි.
    හොදටම රෑ වෙලා. දැන් වෙලාවක් නෑ කරගන්න. හෙට ඉස්කෝලේ ගිහිල්ලා චන්දිමා ටීචර්ට
    මොනවා කියන්නද මන්ද? දැන්නම් නිදා ගන්න ඕනා.

ෂැන්ඩ්‍රියාගේ පියා කේන්තියෙන් කාමරයට අැතුල් වේ
ෂැන්ඩ්‍රියාගේ පියා:   ළමයෝ ! දැන් වෙලාව කියද බලන්න? ඉස්කෝලේ ඇරිලා ආපු වෙලාවේ ඉදලා Internet
         එකෙයි Phone ‍එකෙයි එල්ලිලා. රෑට කෑවෙත් නෑ. ඔහොම ගියොත් ඇස් දෙකත් නරක් වෙයි.
        දොස්තර මහත්තුරුත් කියලා තියෙනවා නේ ඕවා දිහා හැම තිස්සෙම බලාගෙන ඉන්න එපා
        කියලා. බලන්න ලබන සතියේ විභාගේ නේද? තාම පාඩම් කරලත් නෑ නේද?
        අම්මපා ! උඹට වියදම් කළාට වඩා හොදයි මම කිරි හරකෙක් හදා ගත්තා නම්. මෙලහකට
        කිරි විකුණලා ගාණක් හොයා ගන්නවා.අද ‍ Homework කරෙත් නෑ. ඇයි අපිට මේ විදිහට
        දුක් දෙන්නේ? අම්මයි මමයි හැම දේම කරන්නේ ඔය ළමයට නේද? ඇයි ඔහොම තාක්ෂනයට
        ඇබ්බැහි වෙන්නේ. තාක්ෂනය තියෙන්නේ අපේ වැඩ පහසු කරගන්න මිසක් ඒකේ එල්ලිලා
        ඉන්න නෙමෙයි මෝඩයෝ !

ෂැන්ඩ්‍රියාගේ සීයා කාමරයට අැතුල් වේ
ෂැන්ඩ්‍රියාගේ පියා:    (කෝපයෙන්) බලන්න තාත්තේ මේකිට වෙලා තියෙන දෙයක්
ෂැන්ඩ්‍රියාගේ සීයා:    මම මේච්චර වෙලා කතාව අහගෙනයි හිටිය‍ේ. තාක්ෂනය, අන්තර්ජාලය කොච්චර හොද
        දේවල් වලට භාවිතා කරන්න පුළුවන්ද ඔය ළමයින්ට? කොච්චර වටිනා දේවල් Internet
        එකෙන් ඉගෙන ගන්න පුළුවන් ද? කොච්චර වටිනා කියන දේවල් ඕක ඇතුලේ තියෙනවාද?
        ඒ වුනාට මුන් ඒක පාවිච්චි කරන්නේ ටොයිලට් යන ‍‍‍ෆොටෝස් දාන්නයි ඔය ෆෝන් පොල්ල
        කනේ ගහන් දොඩවන්නයි. අර ශ්‍රේෂ්ඨ විද්‍යාඥයා ඇල්බට් අයින්ස්ටයින් බොහොම කාලෙකට
        කළින් මේවා දිවැසින් දැක්කා වගේ මෙන්න මෙහෙම කිව්වා.
        "මට බයක් දැනෙන්නේ අනාගත තාක්ෂනය මිනිස් සබදතා අභිබවා යාවි කියලා".
        බලනකොට ඒකම තමයි දැන් වෙලා තියෙන්නේ. අපි තාක්ෂනයේ වහල්ලු වෙලා.
        අනේ කාලේ වනේ වාසේ කිව්වලු !

(අන්තර්ජාලයේ අප‍ේ ගීතය)

අන්තර් ජාලේ අන්තර් ජාලේ
අන්තර් ජාලේ අන්තර් ජාලේ
කොල්ලයි බල්ලයි ඔක්කොම රිංගන
මේකයි අපගේ අන්තර් ජං ජාලේ

ඉර බැහැගෙන යන කොට
සඳ නැගගෙන එන කොට
Online set වෙන කොට
චැට් එක නැග යන කොට
Home work ටික පැත්තක තියලා
මුහුණු පොතේ අපි පිටු පෙරලනවා

අන්තර් ජාලේ ................

බීබර්ලා සෙලීනලා පිට් බුල්ලා ශාරුක්ලා
ඔක්කොම මගේ අනේ
මූණ දික්කරන් selfies අරන්
Upload කරමු මහ රෑ වෙනකන්
පාඩම් කරන්න කොහෙද වෙලාවක්
ලෝකෙම වැඩ අපේ අතේ දැන්

අන්තර් ජාලේ .....................

ඔන්න ඔහොම කියලා අපි ‍අපේ විදී නාට්‍යය ඉවර කලා. අපි ‍වගේම ළමයිනුත් ගොඩක් මහන්සි වුනා මේ වැඩේ සාර්ථකව කරගන්න. ඒ හැමෝටම ‍ගොඩක් ස්තුතිවන්ත වෙනවා බර්ටියා. වැස්ස හින්දා අපි සැලසුම් කරපු විදිහටම නාට්‍යය පෙන්නන්න බැරිවුනා. ඒක කණගාටුවට කරුණක්. ආයේ වතාවක් නාට්‍යය කරලා ඒක වීඩියෝ කරන්න අදහසකුත් බර්ටියාගේ හිතේ ත‍ියෙනවා. බලමු ඉතින්.