රාත්‍රි 8 පසුවී මිනිත්තු කීපයක් ගිය තැන අයින්හොලොව් පල්ලියේ ප්‍රධාන පූජක තැන වු පූජක නි‍කොලොස් අර්බි නිසොල්මනේ මදක් වෙලා රන් පැහැයෙන් දිදුලන අහස් කුසට ඇස් යොමු කරගත්වනම සිට පල්ලියේ ප්‍රධාන දොරටුව දෙසට පිය මැන්නා. එදින තව දුරටත් දෙවියන්වහන්සේ හමුවීමට කිසිවෙකු නොපැමිණෙන බව ඔහු වසර ගණනක පුරුද්දෙන් දැන සිටියා. ප්‍රධාන දොරටුව වසා දැමූ පූජක තැන තම නිදන කුටිය දෙසට ඇදුනත් කිසිවෙකු පල්ලියේ ප්‍රධාන දොරටුවේ ඇති සීනුව වේගයෙන් නාද කරන හඩ ඔහුගේ සවනේ රැව් පිළි රැව් දී ඇදී ගියා.
කවදාවත් නැතුව? කවුරුන් විය හැකිද මේ අවේලාවේ? සිතමින් ෆාදර් නිකොලස් ප්‍රධාන දොරටුව අසලට පිවිස දොර අඟුල විවෘත කලා. යන්තම් අරින ලද දොරෙන් ෆාදර් නිකොලස්ට දැක ගත හැකිවුයේ තමන් මින් පෙර කිසිම දිනෙක දැක නොතිබූ අතිශයින් විඩාබර මුහුණක්.
ඇයි දරුවා මේ අවේලාවේ?
ෆා...ර් .... ෆාදර් බොහොම අපහසුවෙන් ඒ පුද්ගලයා වචනයක් මුවට නගාගත්තා. නැවත වරක් තොළ කට අපහසුවෙන් දිවෙන් තෙමාගත් ඔහු වතුර . . . මට වතුර ටිකක් දෙන්න ෆාදර් යනුවෙන් පැවසුවා.
වාඩිවෙන්න දරුවා යනුවෙන් කරුණාවෙන් පැවසූ නිකොලස් පූජකතුමා මිනිත්තු කීපයකින් වතුර ජෝගුවක් හා වීදුරුවක් රැගෙන මේ නන්නාදුන පුද්ගලයා ඉදිරියට පැමිණියා. වතුර වීදුරුව වෙනුවට ජෝගුවම උදුරාගෙන මහත් කෑදර ලෙස එය මුවට හලා ගන්නා ආකාරය ෆාදර් නිකොලස් පුදුමයෙන් බලා සිටියා.
සමාවෙන්න ෆාදර්, අද උදේ ඉදන් මේ වෙනකම් මම වතුර ටිකක් බොන්නවත් නොනැවතී ඔබතුමා හමුවෙන්න ආවේ. මම මැතිව්. මෙතන ඉදන් දවස් දෙකක පමණ දුරින් උතුරටවෙන්න පිහිටා ඇති නිට්වික් ගම්මානයෙන්.
මට යාන්තමට වගේ මතකයි මගේ ගුරුතුමා ඔය නම සදහන් කරනවා. ඒත් මට කාරණය නම් මතකයක් නෑ. ඇයි මේ දරුවා මේ හදිස්සියේම මාව හොයාගෙන ආවේ?
සිය ගමන් මල්ලට අත දමා මදක් සෙවු මැතිව්, එයින් එලියට ගත් ෆාදර් කැන්බි විසින් ලබා දුන් ලිපිය ෆාදර් නිකොලස් අතට පත්කළා.
මදක් එහායින් වු පුටුවක් ඒ අසලට ඇදගත් ෆාදර් නිකොලස් එහි අසුන්ගෙන තම අතවු ලිපියට අවධානය යොමු කලා. ලිපිය කියවාගෙන යන ඔහුගේ මුහුණ අතිශයින්ම බැරෑරුම්බවක් ගත්තා. ලිපිය කියවා අවසන් කළ පියතුමා මදක් වෙලා නිසොල්මන්ව සිට සුරතින් සිය පපුවේ කුරුසය ඇද ගත්තා.
අතිශයින්ම භයානකයි! ඔහුගේ මුවින් ඒ වදන මැතිව්ගේ සිත මහත් භීතියකින් වෙලාගත්තා.
මේක අතිශයින්ම භයානක තත්වයක්. මම දන්නේ නෑ මට ඔබට උදව් කරන්න හැකියාවක් තියෙනවද කියලා. බලමු. මම මට පුළුවන් හැමදෙයක්ම කරනවා ඔබේ ගම වෙනුවෙන් යැයි පැවසු පුජකවරයා සිය අසුනින් නැගී සිටියා. මැතිව් අද ඔබට මෙහි නවතින්න පුළුවන්. එන්න මා සමඟ. වචනයක්වත් නොදෙඩු මැතිව් ෆාදර් නිකොලස්ගේ පපුපසින් වැටුණා.
මැතිව්ට රාත්‍රී ආහාර වේල හා නිදා ගැනීමට තැනක් ලබාදීමට තම ගෝලයෙකුට පැවරු පියනම සිය රාජකාරී කුටියට පිවිස ලිපියක් ලිවීම ඇරඹුවා. ලිපිය ලියා අවසන් කළ ෆාදර් නිකොලස් එවේලෙම එම ලිපිය ගෙනගොස් බාරදීමට අතවැසියෙක් පිටත්කර හැරියා. දැන් අපිට තියෙන්නේ බලාගෙන ඉන්න යැයි තමාටම පවසාගත් පූජකවරයා තම නිදන කුටියට පිවිසුනා.
පසුදින උදෑසනින්ම අවදිවු පුජකවරයා, නිට්වික් හි මැතිව් සොයාගෙන ගියා. ඒ වන විටත් අවදිව සිටි ඔහු ගැඹුරු කල්පනාවක නියැලී සිටියා. පූජකවරයා දුටු සැනින් නැගී සිටි ඔහු කිසිවක් කියන්නට පෙර පූජකවරයා සිය හඩ අවදි කලා.
පුතා මැතිව්, අපි අද බලාගෙන ඉන්න තමයි වෙන්නේ. මම ඊයේ රෑම අවශ්‍ය කරන පණිවිඩය යැවුවා. ඔවුන්ගේ වචනයක් ලැබෙන තුරු අපිට ඉන්න වෙනවා.
ෆාදර්, මේක බල බලා ඉන්න වෙලාවක් නෙවෙයි. දැනටත් ගමේ මොනවා වෙලාද දන්නේ නෑ. ජීවිත කීයක් විනාස වෙලාද දන්නේ නෑ දැනටමත්.
දෙවියන්වහන්සේ ඔවුන් රැකදේවි මැතිව්, ඉවසන්න කලබල වීමෙන් කිසිම පලක් නෑ. අපි යමු උදේට කෑම ටිකක් කන්න. ඔබගේ ශක්තිය රැකගන්න ආහාර උවමනායි. එන්න දරුවා.
ඔවුනට මුළු දවසම මෙලෙස බලාගෙන සිටියත් කිසිදු පණිවඩකරුවෙක් අයින්හොලොව් පල්ලිය කරා ලගාවුයේ නම් නැහැ, එදිනෙදා පැමිණෙන වන්දනාකරුවන් හැර. හවස හය පමණ වන විට මැතිව්ගේ සියළුම බලාපොරොත්තු බිද වැටි තිබුණා. ඔහු කිහිප සැරයක්ම ආපසු යෑමට තැත් කළත් පූජකවරයාගේ ඉල්ලීම මත පසු දින වෙනකම් එහි රැදී සිටිමට තීරණය කළා.
සියලූම බලාපොරොත්තු බිදවැටී ගිය මැතිව් රාත්‍රී නවයට පමණ නින්දට යෑමට තීරණය කලා. ඒ තවදුරටත් මෙසේ බලාසිටීම තේරුමක් නොමැති දෙයක් බව ඔහුට හැගීගිය නිසා. ඔහු පූජකවරයාට ආචාර කොට තම කුටිය දෙසට පිය නගනවාත් සමගම පල්ලියේ ප්‍රධාන දොරටුවේ ඇති සීනුව හඩ නැගුවා. ප්‍රධාන දොරටුව දෙසට වහා දිව ගිය ඔහු එය විවර කර බැලුවත් කිසිවෙකුත් දැක ගැනීමේ හැකියාවක් ලැබුණේ නෑ. ඒ වන විට පූජකවරයාද ප්‍රධාන දොරටුවෙන් පිටතට පැමිණ සිටියා.
මේ දෙවියන්වහන්සේගේ නිවහනයි දරුවා. දෙවියන්වහන්සේ සමඟින් කිසිවෙක් විහිළු කරන්නේ නෑ. බලන්න, මෙතෙක් වෙලා මැතිව්ගේ ඇස නොගැටුණු, ප්‍රධාන දොරටුව අසල තබා ගිය ලිපියක් පූජකවරයා මැතිව්ට දක්වා සිටියා.
බලන්න දරුවා, මේ තියෙන්නේ සංවිධානයේ සංකේතය. ලිපියේ ඉදිරිපස ලෝකඩ තැවරුමක ගිල්වු යම් සටහනක් පියතුමා, මැතිව්ට පෙන්වා සිටියා. හොදින් එදෙස බැලු මැතිව්ට දැකගත හැකිවුයේ පස්කොන් තරුවක් (Pentacle) හරහා ගමන් කළ අසිපත් දෙකක්.
පුරාණයේ පටන්ම පස්කොන් තරුව ආරක්ෂාවේ සංකේතයක් ලෙස ප්‍රසිද්ධියට පත්ව තිබුණා. අඳුරේ දඩයම්කරුවන්ගේ සංවිධානයට අනුව අසිපත් දෙක ශක්තිය හා නිර්භීතව නිරූපනය කලා.
බලන්න ෆාදර් මොනවද ලියලා තියෙන්නේ කියලා.
පල්ලියේ ප්‍රධන දොරටුව වසා දැමු ඔවුන් දෙදෙනා, පල්ලියේ ශාලාවේ වු බංකුවක වාඩිවුනා. පූජකවරයා ලිපිය විවෘත කල එය කියවා මැතිව් වෙතට දිගු කලා.
ෆාදර්, මම කියවන්න දන්නේ නෑ. මට කියන්න මොනවද ඔවුන් කියන්නේ කියලා. ඔවුන් අපිට උදව් කරනවාද?
මම ඔබට කලිනුත් පැවසුවානේ මැතිව්, දෙවියන්වහන්සේ අපව අතහැරලා නෑ. ඔවුන් ඔබට උදව් කරන්න කැමතියි. හෙට උදෑසන ඔවුන් ගමනට සූදානම්. ඔබට තියෙන්නේ නගරයෙන් පිටත තියෙන කුඩා ගල් අල්තාරය ළග උදේ 7 වනවිට ගොස් සිටින්න. එතැනට ඔවුන්ගෙන් කෙනෙක් පැමිණෙවි.
ෆාදර්, ඔබට ස්තුති කරන්න මට වචන නෑ. මම කිසිම බලාපොරොත්තුවක් නැතිව සිටියේ.
මට ස්තුති කරන්න අවශ්‍ය නෑ දරුවා මා සිටින්නේ ඔබට උදව් කරන්න. දැන් අපි නිදාගනිමු. ඔබට උදෑසනින්ම පිටවෙන්න තියෙනවා. ඒ වගේම දිගු ගමනක් ඔබ ඉදිරියේ තියෙන්නේ.
දෙවියන්වහන්සේ ඔබව රැකදෙනවා මැතිව්. ඔබගේ ගම්මානයත් දෙවියන්වහන්සේ රැකදේවි.
කඩිනමින් ගමන් කළ මැතිව් ඔර්ක්නේ නගරයෙන් පිටතට පැමිණියා. පූජකවරයා දැක්වු මග සලකුණු ඔස්සේ ගමන් කළ ඔහුට කුඩා ගල් අල්තාරය සොයාගැනීමට අපහසුවක් වුණේ නෑ. එහි පැමිණි වට පිට බැලූ ඔහුට දැකගත හැකිවුයේ කුඩා ගල් අල්තාරය ඉදිරිපස වු ගලක් මත හිදගෙන සිටින හිස වසාගත් පුද්ගලයෙක්. සෙමින් ඔහු කරා එළඹුණ මැතිව්, සිය කටහඩ අවදි කලා.
ඔබ අඳුරේ දඩයම්කරුවන්ගේ සංවිධානයෙන්ද?
පල්ලියේ වචනයට ආවා. ඔබ සූදානම්ද? අපිට දිගු ගමනක් තියෙනවා ඉදිරියට. කාල වර්ණ ඇඳුමක් ඇද සිටි රුව පැවසුවා.
මම මැතිව්, නිට්වික් ගම්මානයෙන්. ඔබ?
මේ ජීවිතකාලය පුරාවට මාව විවිධ නම් වලින් හදුන්වා තිබෙනවා. ඉන් සමහරක් මටත් අමතකයි. ඔබට පුළුවන් මට ලෝගන් කියලා කතා කරන්න. අපි යමු. අපිට ප්‍රමාද වේවි ඉන්න කාලයක් නෑ.
දඩයක්කරුවා යුරෝපීය සම්භවයක් ඇත්තෙක් නම් නොවෙයි. බොහෝ විට ඔහු ආසියාතිකයෙක් විය හැක. ආසියාතිකයින්ට උරුම වු දුඹුරු පැහැති සමකින් යුතු වු ඔහු අඩි හයක් පමණ උසකින් යුතු වුනා. ඒ උසට සරිලන මහතකින් යුත් ඔහුගේ සිරුරේ වැඩුණු මස් පිඩු ඔහු ශක්තිවන්තයෙක් බව ප්‍රකාශ කලා.
ඔහු කාල වර්ණ දිගු කබායක් පැළද සිටියා. එයින් ඔහුගේ සිරුර දණ හිසින් පහල දක්වාම ආවරණය වුණා. හිස වසා සිටි ආවරණයෙන් ඔහුගේ කළු පැහැති කෙස් එළියට පැන ඇති බව දැකගන්න පුළුවන්. ඔහුගේ දුඹුරු පැහැති ඇස් දීප්තිමත්ව බැබලුණා. ඒවා කියා පැවේ ඔහුගේ ඇති නිර්භීත භාවයයි. දකුණු අතේ ඉදිරි පස උඩපැත්තට වන්නට ආරක්ෂිත පස්කොන් තරුවක පච්චයක් දැකගත හැකිවුනා.
බටහිර ගොපළු චිත්‍රපටවල සිටින ගොපල්ලන්මෙන් ඔහු සිය ඉණ දෙපස පිස්තෝල දෙකක් රඳවාගෙන හිටියා. උරහිස හරහා වැටුණු පටියකින් රැදවු මස්කට් වර්ගයට අයත් රයිෆලයක් මෙන්ම ඉණේ දකුණු පැත්තේ රැදවු අසිපතකින්ද ඔහු සන්නද්ද වී සිටියා. එයට අමතරව ඉණේ කිණිස්සක්ද දක්නට ලැබූණා. වඩා සැලකිල්ලෙන් බැලුවොත් ඔහු පැළද සිටි දකුණු බූට් සපත්තුවේ තවත් කිණිස්සක් රදවා තිබුණා. ඔහුගේ වම් උරහිසෙහි තරමක් විශාල බෑගයක් රැදී තිබුණා. සරලවම කිවහොත් ඔහු ඇවිදින ආයුධ ගබඩාවකට සමාන වුනා.
වාඩිවී සිටි තැනින් නැගිට ගත් දඩයක්කරුවා මැතිව් සමග නිට්වික් බලා යන ඒ දිගු අවිනිශ්චිත ගමන ඇරඹුවා.
KB 2020.11.20
No comments:
Post a Comment