ලෝගන්, මේක බරපතල ගැටළුවක්. අපේ සංවිධානයේ තවත් සාමාජිකයෙක් මියගොස් සිටිනවා. මට දැන්නම් හොදටම පැහැදිලියි මේක ක්‍රමණ්ත්‍රනයක් කියලා.
කොහොමද ඔහු මියගිහින් තියෙන්නේ?
පොලීසිය නම් කියන්නේ, මංකොල්ල කෑමක් කියලා. ඒත් එය එසේ විය නොහැකියි. ඔහුව මරාදමන්නට සාමාන්‍ය මංකොල්ලකාරයෙකුට හැකියාවක් නෑ. එකෙක් නෙවෙයි කීප දෙනෙකුටවත් හැකියාවක් නෑ. ඔහු දක්ෂ සටන්කරුවෙක්. මේක අනිවර්යයෙන්ම රැක සිට කරපු පහර දීමක් වෙන්න ඕන. මේ වසර ඇතුලත ප්‍රංශයෙන් පමණක් දඩයක්කරුවන් හයදෙනෙක් මිය ගිහිල්ලා තියෙනවා. එයින් එක් අයෙක් මැන්ටිකෝර් පහරදීම නිසා. අනිත් පහම මේ වගේ අසාමාන්‍ය මරණ.
පිටතින් දකින කෙනෙක්ට මේවා සමාන්‍ය මරණ වුනාට අපිට ඒවා අසාමන්‍යයි.
ඔබ හරි ලෝගන්. ඩේව් ඉක්මනට යමක් හොයාගත්තොත් හොදයි මේ ගැන. නැත්නම් නිරපරාදේ තව කීදෙනෙකුට මැරෙන්න වෙයිද දන්නේ නෑ.
අපිට බැරිද ඉතුරුවෙලා සිටින දඩයක්කරුවන් මෙහාට කැදවන්න?
ඒක කරන්න බෑ ලෝගන්. බැරිවෙලා හරි මෙතනම කුමණ්ත්‍රනකරුවෙක් සිටියොත්. ඔවුන් දැනගන්නවා අපි යමක් ගැන සැකකරන බව. එහෙම වුනොත් අපිට කිසිම දෙයක් සොයාගත් නොහැකිවෙනවා. අපේ කාර්යය පටන් ගත්ත තැනම අතහැරලා දාන්න වෙනවා අපිට.
එහෙම නම් අපිට ඔවුන්ට අනතුරු ඇඟවීමක් කරන්නවත් හැකියාවක් නෑ. අපි දන්නේ නෑ ඔවුන්ගෙන් කෙනෙක් මේ ක්‍රමණ්ත්‍රණයට හවුල් බව නොදන්නා නිසා.
කියන්න කණගාටුයි ලෝගන්. ඒත් ඒක එහෙම වෙන්න පුළුවන්.
හදිස්සියේම ග්‍රෑන්ඩ් මාස්ටර්වරයාගේ රාජකාරී කාමරයේ දොරට තට්ටු කර එයට ඇතුල් වුයේ බෙන්ජමින්. ඔහු එහි ඇතුල්වී ග්‍රෑන්ඩ් මාස්ටර්වරයාට ආචාර කර සිටියා.
ඇයි බෙන්ජමින් මේ හදිස්සියේ?
උතුමාණනි, ඔබ හමුවීමට අමුත්තෙක් ඇවිල්ලා.
අමුත්තෙක්? ඒ කවුද?
ඇත්තෙන්ම කිවුවොත් ඒ අමුත්තියක්. ඇය තමන්ගේ නම ප්‍රකාශ කිරීමෙන් වැළකී සිටිනවා උතුමාණනි. ඇයට වහාම ඔබතුමන්ව හමුවිය යුතු බව තරයේ ප්‍රකාශ කර සිටියා.
බෙන්ජමින්ගේ මේ ප්‍රකාශයෙන් අනතුරුව මොහොතක් කල්පනා කළ ග්‍රෑන්ඩ් මාස්ටර්වරයා.
දැන් ඇය කොහෙද බෙන්ජමින්?
එපා බෙන්ජමින්. මා එන්නම් ප්‍රධාන දොරටුව අසලට. ලෝගන්,
කිසිවක් නොකියාම නැගී සිටි ලෝගන් ග්‍රෑන්ඩ් මාස්ටර්වරයා පිටි පසින් ඉදිරියට ඇදුනා. සුළු මොහොතකට පසු මාළිගයේ ප්‍රධාන දොරටුව අසලට ආ ග්‍රෑන්ඩ් මාස්ටර්වරයා ඉන් මාළිගයේ මිදුලට පිවිසුණා. ඔහුට මදක් පිටු පසින් සිය හිස ආවරණය කරගත් දඩයක්කරුවා හිටගෙන සිටියා. ග්‍රෑන්ඩ් මාස්ටර්වරයා මුණගැසීමට පැමිණ සිටි අමුත්තියත් ඔවුන්ට පිටුපා දැඩි කල්පනාවක නියුතුව සිටියා. ඇයත් ලෝගන් ලෙසින්ම හිස ආවරණය කරගෙන සිටියා.
ඔබ කුමන හේතුවක් නිසාද මා හමුවීමට ආවේ?
ග්‍රෑන්ඩ් මාස්ටර්වරයා තමන්ට පිටුපා සිටින අමුත්තියගෙන් විමසා සිටියා. මොහොතකින් ඔහු දෙසට හැරුණු ඇය,
ඔබද අඳුරේ දඩයක්කරුවන්ගේ සංවිධානයේ ප්‍රධානියා? එහෙමත් නැතිනම් ග්‍රෑන්ඩ් මාස්ටර්වරයා?
මේ ප්‍රශ්නය ග්‍රෑන්ඩ් මාස්ටර්වරයාගෙන් විමසන අතරම අමුත්තියගේ ඇස් යොමුවුනේ ඔහුට මඳක් පිටුපසින් සිටගෙන සිටි දඩයක්කරුවා වෙතයි.
ලෝගන්? මේ ඔබද? මා ඔබව මෙහි දකින්නට ලැබෙවි කියා නම් කිසිවිටෙකත් බලාපොරොත්තු වුයේ නම් නෑ. මා මෙහි පැමිණියේ ඔබව සොයමින්.
මෙසේ පැවසූ ඇය තම හිස වසා සිටි ආවරණය ඉවත්කර දැමුවා. අනතුරුව සිය හිස මදක් සලා දැමු ඇයගේ කළු පැහැති දිගු කෙස් වැටිය සැඳෑ සුළඟින් විසිරී ගියා.
නයෝමි? ඔබ?
ඉදිරියට දිව ආ නයෝමි ලෝගන්ව වැළඳගත්තා. මොහොතක් එලෙස සිටි ඇය ඊළඟ මොහොතේ ඔහුගෙන් මිදුණා.
නයෝමි, මම හිතුවේ නෑ ඔබව නැවත වරක් දකින්න ලැබෙයි කියලා. කොපමණ කාලයකට පසුවද?
මම හිතන්නේ වසර 80 කට පමණ පසුව.
ඔබට කාලය කාරුණික වී තිබෙනවා. මම ඔබව එදා දැක්කා වගේමයි.
ඔබත් එලෙසයි ලෝගන්. කාලයට වඩා සෙලීනා රැජිණ මට කාරුණික වුනා. එතුමිය ඔබට ලබාදුන් වරය මටද ලබාදුන්නා.
කෝ නිකොලස්?
ඔහු තව දුරටත් අපි අතර නෑ ලෝගන්. ඔහු කැමත්තක් දැක්වුයේ නෑ තමන්ට නියමිත කාලයට වඩා ජීවත්වෙන්න. මීට වසර 25 පමණ පෙර ඔහු අවසන් හුස්ම හෙලුවා. අපි ඔහුව දූපතේ එළිෂා වෙනුවෙන් නිර්මාණය කළ ස්මාරකය අසලින් මිහිදන් කළා.
මෙයින් අනතුරුව ග්‍රෑන්ඩ් මාස්ටර්වරයා දෙසට හැරුණු ලෝගන්, නයෝමිව ඔහුට හදුන්වා දුන්නා.
උතුමාණෙනි, මේ ඉන්නේ නයෝමි ජෙනෙවියර්. මගේ පැරණි මිතුරියක්. වරක් ඇය මගේ මඟපෙන්වන්නිය ලෙස කටයුතු කළා. නයෝමි, මේ ඉන්නේ අඳුරේ දඩයක්කරුවන්ගේ සංවිධානයේ වර්තමාන ප්‍රධානියා ග්‍රෑන්ඩ් මාස්ටර් රොබට් ඩී. ලුකස් නයිට්වරයා.
හදුනා ගන්න ලැබීම සතුටක් උතුමාණෙනි.
ඔවුන් දෙදෙනාම අතට අතදී එකිනෙකාට ආචාර කරගත්තා.
අපි ඇතුළට යමු ලෝගන්. අපේ අමුත්තියට මහන්සිත් ඇති.
සිය රාජකාරී කාමරයට පැමිණ එහි අසුන් ගැනීමෙන් අනතුරුව ග්‍රෑන්ඩ් මාස්ටර්වරයා එහි වු සීනුව නාද කරනු ලැබුවා. අනතුරුව එහි පැමිණි බෙන්ජමින්ට යමක් පැවසු ඔහු ලෝගන් හා නයෝමි දෙසට හැරුණා.
මම හිතනවා ඔබ හදිස්සියේම පැමිණියේ ලෝගන්ව බලලා යන්න නොවේ යැයි කියලා.
ඇත්තම කිවුවොත් මම මෙහි පැමිණියේ ඔබතුමා හමුවන්න. ඔබතුමා මාර්ගයෙන් ලෝගන්ව සොයාගන්න. ලෝගන් මෙහි සිටීම හේතුවෙන් මා පැමිණි කාර්යය වඩාත් පහසුවුනා කියලා කියන්න පුළුවන්.
ඇත්තට නයෝමි, ඇයි ඔබ හදිස්සියේම පැමිණියේ? මම කොහොමටවත් හිතුවේ නෑ ඔබ ස්කැන්ඩිනේවි ප්‍රදේශයෙන් පිටතට පැමිණේවි කියලා.
මම විස්තරය මුල ඉදලම කියන්නම් ලෝගන්. මේ බොහොම වැදගත් කාරණාවක්. මීට අවුරුදු දෙකකට පමණ පෙර “සෙලීනා” රැජිණගේ ජීවිතයට තර්ජනයක් එල්ල වුනා.
මොනවා?
ඔව් ලෝගන්. ඇයව ඝාතනය කිරීමට කුලී ඝාතකයෙක් “එවිග්” දූපතට පැමිණියා. කෙසේ නමුත් ඝාතකයාගේ උත්සාහ සාර්ථක එකක් වුනේ නෑ. අපේ ආරක්ෂකයන්ට මේ කුලී ඝාතකයාව ජීව ග්‍රහයෙන් අල්ලා ගැනීමට හැකියාවක් ලැබුණා. අප ඔහුගෙන් ප්‍රශ්න කළත් එයට සාර්ථක පිළිතුරක් ලබාගැනීමට හැකියාවක් ලැබුණේ නෑ. අන්න ඒ හේතුව නිසා රැජිණට සිදුවුනා තමන්ගේ මායා බලය යොදා කුලී ඝාතකයාගෙන් ප්‍රශ්න කරන්න. අන්න එතනදී අපිට නොසිතු කරුණු රාශියක් දැනගන්නට ලැබුණා. ඒ තොරතුරුත් එක්ක මේ ගැන වැඩිදුර තොරතුරු දැනගන්න අපි ඔත්තුකරුවන් කීප දෙනෙක් මේ කුලී ඝාතකයාගෙන් දැනගන්නට ලැබුණු මුලාශ්‍ර වලට පිටත් කර හැරියා. ඒ හරහා දැනගන්නට ලැබුණු කරුණු බොහොම බිහිසුණුයි. ඇත්තටම කිවුවොත් මේක බොහොම දරුණු කුමණ්ත්‍රනයක්. මේ කුමණ්ත්‍රනය එක එල්ලේම ඔබලාගේ සංවිධානයට සම්බන්ධවෙනවා.
මම ඔබට කිවුවේ ලෝගන්. අප සංවිධානයට එරෙහිව කුමණ්ත්‍රනයක් සිදුවෙනවා කියලා.
ඒ කියන්නේ ඔබලා මේ ගැන දන්නවා.
අපි මේ ගැන ලොකු විස්තරයක් දන්නේ නෑ. ඒත් ග්‍රෑන්ඩ් මාස්ටර්වරයාට ටික කාලයක ඉදලා සැකයක් තිබ්බා අපේ සංවිධානයට විරුද්ධව කුමණ්ත්‍රනයක් සිද්ධවෙනවා කියලා. අපි ඒ ගැන දන්නේ බොහොම ටිකයි. මේ වෙනකොටත් අපි ඒ ගැන කරුණු සොයමින් පවතිනවා.
මීට අවුරුදු 25 කට පමණ පෙර අඳුරට බලවේගයක් හා ඒ බලවේගයට කැමති පුද්ගලයින් කීපදෙනෙක් එකතුවෙලා සංවිධානයක් පිහිටවා ගන්නවා ප්‍රංශය මූලික කොටගෙන. මේ සංවිධානය “අඳුරේ දූතයන්” නමින්. එහි ප්‍රධානියාවෙන්නේ වෑම්පයරයෙක් එහෙමත් නැත්නම් ලේ උරා බොන්නෙක්. ඔවුන් කෙටි කාලයක් ඇතුලත තේරුම් ගන්නවා ඔවුන්ගේ අනාගත සැලසුම් වලට එරෙහි වන්නට පුළුවන් බලවේග දෙකක් මේ ලෝකේ තියෙනවා කියලා.
ඒ මොනවාද නයෝමි?
උතුමාණනි, එකක් ඔබලාගේ සංවිධානය. ඒ කියන්නේ “අඳුරේ දඩයක්කරුවන්ගේ සංවිධානය”. තව කෙනෙක් තමයි “සෙලීනා රැජිණිය”. අන්න ඒ පදනම් මතයි මේ සංවිධානය කුළී ඝාතකයෙක් අපේ දූපතට එවන්නේ. ඔහුට කෙසේ හෝ හැකියාවක් ලැබෙනවා ආලෝකයේ මං පෙත තරණය කරලා අපේ දූපතට පැමිණෙන්න. බොහෝ විට මේ ඝාතකය ඒ සඳහා අඳුරු මායාවන් භාවිතා කරන්න ඇති කියලා අපි හිතනවා. මේ හේතුව හින්දා අපිට අපේ ආරක්ෂාව කිහිප ගුණයක් තර කරන්න සිද්ධ වුනා. අපි ආලෝකයේ මං පෙත වසා දැම්මා නැවත එය විවෘත කරන්න බැරි විදිහට.
එතකොට ඔබ කොහොමද මෙහි ආවේ?
ඒක රහසක් ලෝගන්. ඒ ගැන ඔබට කියන්න අවසරයක් නෑ මට. අඩුම ගානේ මේ මොහොතෙදි අවසරයක් නෑ මට.
මීට දවස් කිහිපයකට පෙර රැජිනට සිය ඔත්තුකරුවෙකුගෙන් විශේෂිත වු ආරංචියක් දැනගන්නට ලැබෙනවා. අන්න ඒ ආරංචිය අරගෙන තමයි මම ලෝගන්ව සොයාගෙන ආවේ.
ඒ කියන්නේ ඔබ මේ ආරංචිය අරගෙන ආවේ ලෝගන්ට?
ඔව්. ඔබ සංවිධානය ඇතුලත මා විශ්වාස කරන අය සිටියේ දෙදෙනයි. ඉන් එක් අයෙක් තවදුරටත් ජීවතුන් අතර නෑ. ඉතිරි කෙනා ලෝගන්. මම ලෝගන් මගේ ජීවිතයටත් වඩා විශ්වාසයි. මෙහෙම කියනවට මට සමාවෙන්න උතුමාණෙනි. මෙහි එනකොට ඔබටවත් මේ විස්තර දැනුම් දෙන්න මගේ අදහසක් තිබ්බේ නෑ.
නෑ එයට සමාව ඉල්ලීමට අවශ්‍යතාවයක් නෑ. ඔබලා දෙදෙනා අතර ඇති අවබෝධය මට තේරුම් ගන්න පුළුවන්. ඒත් ඔබ දැන් මේ විස්තර මට කියන්නේ?
මේ කෙටි කාලය ඇතුලත මට පැහැදිලිව තේරුම් ගියා ලෝගන් ඔබව විශ්වාස කරනවා කියලා. ඒකයි මම මේ විස්තර ඔබත් සමඟ බෙදාගන්නේ.
මේ මාළිඟය ඇතුලත ඉන්න අයගෙන් අප සංවිධානයට එරෙහිව ඇති කුමණ්ත්‍රනයක් ගැන දන්නේ අපි තිදෙනා හැර තවත් එක් අයෙක් පමණයි.
ග්‍රෑන්ඩ් මාස්ටර්වරයා මෙසේ පවසා නිමවෙනවාත් සමඟව කාමරයේ දොරට තට්ටු කරන ශබ්දයක් ඇසුණා. අනතුරුව විවර වුණු දොරින් ඇතුලුවූ බෙන්ජමින් හා තවත් සේවකයෙක් ඔවුනට තේ පානය කිරීමට අවශ්‍ය දෑ රැගෙන ආවා.
හරි බෙන්ජමින්. ඔබට ස්තූතියි.
සේවකයින් දෙදෙනා එයින් පිටත්ව යෑමෙන් අනතුරුව තේ පානය කරමින් ඔවුන් තව දුරටත් මේ කුමණ්ත්‍රනය ගැන කතා බහක නියැලුනා.
දැනට අපි මේ ගැන හොයලා බලන්න විශේෂ කණ්ඩායමක් යොදවලා තියෙනවා. ඔවුන් කිසිවෙක්ම ප්‍රංශය තුළ ක්‍රියාත්මක නොවුණු අය.
ප්‍රශ්නේ තියෙන්නේ, මේ “අඳුරේ දූතයන්”කියන සංවිධානය කොතරම් දුරට ඔබ සංවිධානය තුළට කිදා බැහැලද කියන් එකයි උතුමාණෙනි. අපිට සැම විටම ඒ ගැන කල්පනාවෙන් කටයුතු කරන්න සිද්ධවෙනවා. ඇත්තටම මා මෙහි පැමිණීමට හේතුවුයේ වෙනත් කාරණයක්.
ඒ මොකක්ද නයෝමි?
මෙය අපට සම්බන්ධවෙන්නේ කොහොමද?
ලෝගන්, අපට ලැබී ඇති තොරතුරු අනුව “අඳුරේ දූතයන්” සංවිධානය මේ චන්ද්‍ර ග්‍රහණය වෙලාවට අතීතයේ සිටි අතිශයින්ම දුෂ්ඨ මහා මන්තරකරුවෙක්ටයි ඒ වගේම දරුණු වෑම්පයර් රජෙකුටයි පණදෙන්න සූදානම් වෙනවා.
මොනවා?
ඔව් උතුමාණෙනි, මේ සංවිධානය මේ දුෂ්ඨයන් දෙදෙනා යොදාගෙන මේ ලෝක තලය මත තියෙන සියළුම අඳුරට එරෙහි බලවේග විනාශ කරලා දාන්න සූදානම් වෙනවා. “අඳුරේ දූතයන්” සංවිධානයට තියෙන ලොකුම හිසරදය ඔබලාගේ සංවිධානය. මගේ රැජිනත්, ඔබලාගේ සංවිධානයත් නොමැති වු විට ඔවුන්ට තමන්ට කැමති විදිහට මේ ලෝකය පාලනය කරන්න පුළුවන්. මේ විස්තර දැනගත්ත ගමන් රැජින මට අණ කලා ඔබට හමුවී මේ ගැන දැනුම් දෙන්න කියලා.
උතුමාණෙනි, අපි හිතනවාට වඩා විශාල ප්‍රශ්නයකට අපි මුහුණ පාලා තියෙන්නේ.
ඔව් ලෝගන්. මා කිසිදාක මේ “අඳුරේ දූතයන්” සංවිධානය ගැන අසා නෑ.
උතුමාණෙනි, ඔබතුමා පමණක් නොවෙයි මමවත් මේ සංවිධානය ගැන අසා නෑ.
ඔවුන් ඒක බොහොම දක්ෂ විදිහට සඟවා තිබෙනවා උතුමාණනි. රැජිනගේ ඝාතන ප්‍රයත්නය අසමත් වී කුලී ඝාතකයාව පණ පිටින් අල්ලාගන්නට ලැබුණු නිසයි අපටත් මේ ගැන දැනගන්නට ලැබුණේ. එසේ නැත්නම් මේ සියල්ල තවමත් ලෝකයට රහසක්.
නයෝමි, ඔබ දන්නවාද පණදීමේ කාර්යය සිද්ධවෙන්නේ කොහෙද කියලා?
තවම නෑ උතුමාණෙනි. ඒ පිළිබදව තොරතුරු තවම මගේ රැජින වෙත ලැබිලා නෑ. යමක් ලැබුණොත් එතුමිය එය මට දන්වාවි.
නැවත වරක් නයිට්වරයාගේ කාමරයේ දොරට තට්ටු කිරීමෙන් අනතුරුව එහි පිවිසුණේ බෙන්ජමින්. ඔහු බන්දේසියක තැබූ ලිපියක් රැගෙනවිත් තිබුණා.
මේ කුමක්ද බෙන්ජමින්?
උතුමාණෙනි, මොහොතකට පෙර මෙහි පැමිණි අයෙක් ඔබතුමා අතටම මේ ලිපිය දෙන්න යැයි පවසා සිටියා.
ඔබ ඔහුගේ නම ඇසුවේ නැද්ද බෙන්ජමින්?
ඔහු නමක් පැවසුවේ නෑ. ඒත් ලිපියේ ඇති මුද්‍රාව ඔබතුමා හදුනන බව ඔහු ප්‍රකාශකර සිටියා.
ලිපිය ග්‍රෑන්ඩ් මාස්ටර්වරයාට පිළිගැන්වූ පසු එහි වු මුද්‍රාව දෙස මොහොතක් විමසිල්ලෙන් බලාසිටි ග්‍රෑන්ඩ් මාස්ටර්වරයා එහි වු මුද්‍රාව බිද දමා ලිපිය විවෘත කර එය නිහඩවම කියවන්නට ගත්තා. එය කියවා අවසන් කළ ඔහු බෙන්ජමින් දෙසට හැරුණා.
බෙන්ජමින්, අපි ඊයේ හවස එළියට යන්න පාවිච්චි කළ අශ්ව රථය සුදානම් කරන්න. ඒ වගේම සෙඩ්රික්ට එන්න කියලා පණිවිඩයක් යවන්න. මම හිතන්නේ ඔහු ඇත්තේ නව තාක්ෂනික අංශයේ.
ලෝගන්, ඩේව්ට පොටක් පෑදිලා. ඔහුත් යමක් සොයාගෙන. නයෝමි, ඔබ නිවැරදිම වෙලාවට මෙහි පැමිණ තිබෙනවා. අපි දැම්මම යමු ඔවුන් මුණ ගැහෙන්න. මම හිතන්නේ අපිට නාස්ති කරන්න කාලයක් ඉතිරිවෙලා නෑ. නයෝමි, ඔබත් එන්න අප සමඟ. මට ඇත්තටම කණගාටුයි. ඔබට විවේක ගැනීමටවත් කාලයක් නොලැබීම ගැන.
ඒ ගැන වද වෙන්න එපා උතුමාණෙනි. මේ කාරණය මගේ විවේකයට වඩා බොහොම වැදගත්. මේක මේ මුළු ලෝකයටම වැදගත්වන කරුණක්.
අපි එහෙනම් පිටත්වෙමු.
තවත් විනාඩි දහයකට පමණ පසුව ග්‍රැන්ඩ් මාස්ටර්වරයා, ලෝගන්, නයෝමි හා සෙඩ්රික් රැගත් අශ්ව රථය මාළිගාවෙන් පිටත්වුනා.
___________________________________________________________________________________
KB 2021.05.24
No comments:
Post a Comment